Maleruagassaq assigiinngisitsisoq atorunnaarsinneqarpoq

Canadamiut biskoppiisa ilagiittut maleruagassaq ukiunik 500-nik pisoqaassusilik assuarliutigaat.
aggustip 26-at 2009 12:11

Sapaatit akunnerisa marluk matuma siornatigut USA-mi anglikanerit biskoppiisa maleruagassap ukiunik 500-nik pisoqaassusillip ”Doctrine of Discovery”-mik taaneqartartup, ilagiit inatsisaattut oqaatigineqarsinnaasup anglikanerini palasit biskoppillu maleruagassaat, assuarliutiginissaa aalajangiuppaat. Taanna tassaavoq ilagiit maleruagassaat siunertaqarlunilu Amerikami avannarlermi inuit ”nujuartat” tassalu Inuit eqqillillu kuisimanngitsuummata kristumiuunatillu, taava ajoqutissaqanngilluinnartoq allaallu Guutip piumasarigaa, Europamiut Amerikamut avannarlermut tikiukkamik taakkua nunaannik pigisaannillu tamanik arsaarinnissinnaasut.

Maleruagassaq Tuluit kunngiannit Henrik arfineq-aappaannit 1493-imi suliarineqartoq naapertorlugu ilisimasassarsiorlutik angalasut nunanik, nunaatinik, nunallu immikkoortuinik Amerikami avannarlermi kuisimanngitsut pigisaannik arsaarinnissinnaapput.

Nunap inoqqaavisa kuisimanngitsuunerannut taamalu inunnit allanit suunnginnerusutut isumaqarneq taanna arlalippassuartigut ullumikkumut allaat malunniuteqartarsimavoq.

Amerikami anglikanerit biskoppiisa ilisimasassarsiortunut maleruagassaq taanna qaammatip ataatsip matuma siorna assuarliutigaat, maannalu Canadamiut biskoppii aamma taamaaliorlutik. Biskoppit taakkua suleqatigiillutik tassa maanna Tuluit Nunaanni dronning Elizabeth ilagiinnut anglikaneriusunut qullersaasoq qinnuigaat taassuma pisortatigoortumik ”Doctrine of Discovery” atorunnaarsimasutut nalunaarutigissagaa. Neriuutigineqarpoq dronning Elizabethip aamma maleruagassaq taanna ukiunik 500-nik pisoqaassusilik nunasiaateqarnermilu naapertuilluarnerunngitsorpassuarnik kinguneqarsimasoq utoqqatsissutigissagaa.