Maleruagassanik sukaterinissamut misissuisoqarpoq

septembarip 09-at 2005 11:24

Nukissiorfiup pisortaa Svend Ove Nielsen aggustip 15-iani suliunnaarsinneqaannarnani ullormili tassani atuutilersumik soraarsinneqassasoq, naalakkersuisut ippassaq aalajangerput. Nukissiorfiup pisortarisimasaata ingerlatseqatigiiffiup akiligaanik namminerminut pisiortortarsimanera soraarsitaaneranut peqqutaatinneqarpoq. Soraarsitsinerli annerusumik oqaaseqarfigiumaneqanngilaq.

- Oqaaseqarsinnaanngilanga, aamma oqaaseqaqqusaanngilanga. Inuussutissarsiornermut pisortaqarfimmi pisortaq Peter Hansen, soraarsitsineq, soraarsitaasoq qanoq pineqassanersoq taarsiisitsiniartoqassanersorlu pillugit aperineqarami taama akivoq.

Aningaasanilli atuinermut maleruagassanik sukaterisoqarsinnaanersoq misissorneqartoq erseqqissaatigaa.

- Pisimasoq tunngavigalugu Nukissiorfimmi aqutsisut kukkunersiuisullu suleqatigalugit sukaterisoqarsinnaanersoq paasiniarparput, sulili naammassinngilavut, siunissamili qaninnerusumi naammassissaavut. Tassami atornerluisoqarsinnaasussaanngilaq. Peter Hansen nassuiaavoq.

Namminersornerullutik Oqartussat ingerlatsiviini aningaasanik atuinissamut tunngaviusumik maleruassaqarpoq, sukaterisoqassappalli suliffeqarfinnut assigiinngitsunut naleqqussaasoqaqqaartariaqarmat, maleruagassanik misissuinissamik pilersaaruteqartoqanngikkallartoq, Peter Hansen oqarpoq.

Nukissiorfiit pisortaat Svend Ove Nielsen suliffeqarfiup akiligaanik namminerminut pisortortarsimasoq paasineqarmat aggustimi suliunnaarsinneqarallarpoq. Sermitsiap ullumi saqqummertup allaaserisaa naapertorlugu, Svend Ove Nielsenip ilaatigut ilaquttani ilagalugit angalasarsimavoq, timmisartunik attartortarsimavoq, akisoorsuarnillu nerisarnermi saniatigut allaffini 287.000 koruunit nalinginut pequsersorsimallugu.

Inuussutissarsiornermut pisortaqarfiup tusagassiutitigut nalunaarutaani allassimavoq, Svend Ove Nielsenip pisiortortarsimanini pillugu nassuiaataa ataasinngormat tigusimagitsik, nutaartaqanngimmalli soraarsitsisoqassasoq naalakkersuisut aalajangerput.