Malersuititsiniarneq Pakistanip kamaatigaa
Pakistanimiut taama kissaateqartoqarnera kamaatigaat, Pakistanimut sakkortuumik pissusilersorneq nunat killiit peqqarniisaarniarnermut sorsunneranni akunnatoorutinut ilaavoq.
USA Pakistanimut qaartartumeerigaangat nuannarinnginneqartaqaaq, taamaattumillu Amerikamiut sakkutuui Pakistanimut pissagaluarpata Pakistanimiunit akuerineqarsinnaanngilluinnarpoq. Pakistan peqqarniisaarnianut sorsunnermi ilaagaluarluni nammineq piumasani tunngavigerusuppai.
Sakkutuut immikkut sungiusakkat Pakistanimut saassusisarneri kamatsitsingaatsiartarput, siunissamilu saassussisarnerit assigiinngitsunik kinguneqapilussinnaapput; nunat killiit Pakistanillu suleqatigiinnerannut aammalu sorsuttartoqatigiit sakkutuussarsiornissaannut.
Nunat killiit maannamut Pakistanimiut sakkutuuinut isertortumillu paasiniaasartuinut, sorsuttartoqatigiinnut ikinngutinnersunut, ikinngutinnersimapput. Eqqunngitsuliorfigineqartutut misigigunik USAp nunallu killiit peqqarniisaarnianut sorsunnerannut, maannamit ingasannermik, akerliulersinnaapput.
Pakistanimi isertortumik paasiniaasartut Amerikamiut saassussileraangata sorsuttartoqatigiit sungiusartarfii kalerittarsimagaat, CIA-p paasisimavaa. Pakistanip nunallu killiit suleqatigiinnerat atorunnaassappat ajornartorsiutissaasinnaasut maanna ersereerput.
Talibanimi siuttut siusinnerusukkut oqareerput, amerikamiut Pakistanimut qaartartumeerineri, sorsuttartussanik nutaanik nassaarniarnerminnut iluaqutigisimallugu. Pakistanip ilaani amerikamiunut kamanneq ima sakkortutigaaq allaat angutit inuusuttut ingasattajaalersissinnaallugit. Amerikamiullu sakkutuui Pakistanip nunataaniilissagaluarpata kamanneq annertusiinnassaaq.
