Malenep Nuummi silami qullersuit amigaatigai
Nuup illoqarfiani immikkoortuinilu Nuussuarmi Qinngutsinnilu silami qullersuit maanna taarsisalernerani ikinngitsoortarnerat innuttaasunit maluginiarneqarpoq.
Qullersuit qaminngasarnerat toqqissisimananngitsoq ulorianartorlu innuttaasunit inuit oqallittarfianni ilaatigut uparuarneqarpoq, pisuinnaammi taartunik atisallit reflekseqanngitsullu biilertunit takujuminaatsinneqarsinnaasarmata. Innuttaasut ilaat Facebookimi ilaatigut ima allappoq; issuaaneq aallartippoq:
- Atertamiik Nukallup tungaanut qamingasarnera quilertanartarpoq.
Malene Didriksen Nuussuarmi Attartumi najugaqarpoq. Taartillugu aqqusinikkoornissani toqqissisimanartinngilaa, qulliimmi qaminngatillugit inuit biilertunit takuneqanngitsoorneqaratarsinnaammata.
- Bussiniit unnukkut niugaangana mobilima qulleeraa qaammaqqutigisarpara. Unnukkut kisimiilluni aqqusinikkoortarneq toqqissisimananngilaq. Malene Didriksen oqaluttuarpoq.
Juulimi taarsisalermalli silami qullersuit ikinneqarsimanngillat.
Tamannalu pillugu inuit kommunimut Nukissiorfinnulluunniit saaffiginnikkaangata paatsiveeruttoqartarpoq.
-Kommunimut sianeraangatta Nukissiorfinnut saaffiginneqqusisarput, Nukissiorfinnullu sianeraangatta kommunimut saaffiginneqqusisarlutik. Sapaatit akunnerannili uani qullersuit ikumasalernerat toqqissiallannaqaaq, Malene Didriksen KNR-imut oqarpoq.
Silami qullersuit qaminngasarnerat Nukissiorfiit ajuusaarutigaa.
Sanaartorneq teknikilu qulliit qaminngasarnerannut peqqutaaqataasut
Tamanna ilaatigut teknikimik sanaartormillu peqquteqartoq, Nukissiorfiit Nuummi immikkoortortaanni pisortaq Filip Sivertsen KNR-imut nassuiaavoq.
Silami qullersuarnik ikumanngitsoqarpat tamanna Nukissiorfiit sullissiviannut 80 11 50-imut siarngutigineqarsinnaavoq imaluunniit emailikkut nalunaarutigineqarsinnaalluni, uunga:
- Assigiinngitsunik peqquteqarpoq, Nuussuarmi Kigutaarnani silami qullersuit piffissami sivittajaami qaminngapput kabilit ajoquteqarmata, ajoqutaasorli maanna iluarsineqareerpoq.
Maanna Qinngutsinni Unaami, Nuup ilaani Kujallerpaani Nuukullammilu qullersuit sanaartortut qullernik qamitsisimammata qaminngapput, qullersuillu ikeqqeqqullugit sanaartortut maanna piumaffigineqareersut Filip Sivertsen oqarpoq.
- Innaallagisserisutta taarsisalernerata kingornagut aqqusernit qullii ikinngitsoorsimasut tulleriiaarlugit suliarileruttorpaat, Filip Sivertsen oqarpoq.
