Malawi: Præsidenti anguteqatiminoortartunut iperagaatitsivoq

Afrikami naalagaaffiup Malawip præsidentia Bingu wa Mutharika, aappariinnut anguteqatiminoortartunut, katissimanertik pissutigalugu ukiuni 14-ini sapaatip akunnerani kingullermi parnaarussassanngortitaasunut maanna utoqqatsissuteqarpoq.
Allattoq Elisa Isaksen
maajip 30-at 2010 13:38

Præsidentip aamma Naalagaaffiit Peqatigiit pisortaata Ban Ki-moonip oqaloqatigeereernerisigut utoqqatsertoqarpoq.

- Ullumikkumiit atuutilersumik saammaanneqarnissaat aalajangiuppara ingerlaannartumillu iperagaatinneqassapput, præsidenti oqarpoq.

Præsidentip taama aalajangiinera Ban Ki-moonip nuannaarutigaa.

- Angutit inuusuttut taakku iperagaatinneqarnerat nuannaarutigaara aalajangiinerlu nersualaarlugu, Naalagaaffiit Peqatigiit pisortaat oqarpoq.

- Pineqaatissiisarnermut inatsit taanna pisoqalisoq, nunarsuatsinni sumiluunniit atuutsinneqaruni nutarterneqartariaqarpoq, Ban Ki-moon taama kajumissaarivoq.

Sapaatip-akunnerani kingullermi angut 26-nik ukiulik katitaalu angut 20-nik ukiulik katissimanertik pissutigalugu Malawimi eqqartuussivimmi ukiuni 14-ini parnaarussassanngortitaagaluarput.

Suiaaqatinik atoqateqarneq Malawimi Afrikamilu naalagaaffinni amerlanerni inerteqqutaavoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq