Mala Høy Kúko nunagisani pillugu Atassummit tunuartoq

Mala Høy Kúko Atassummit tunuarpoq. Inuttaa naapertorlugu politikkikkut kissaatigisaminut partiip aporfiusimanera pissutigalugu partii qimappaa.

- Nunagisannit siunnersuutit sammisassallu partiikkoortumik Inatsisartunut anngutsissinnaasimannginnerat pissutaasut ilagivaat.

Mala Høy Kúko naapertorlugu, siunnersuuteqartannginnini nunagisamini isornartorsiorneqartarpoq.

- Qinigaaffik naappat siunnersuuteqarsimanangalu, taava qinersisartukka isornartorsiuillutik apeqqusiissapput, Mala Høy Kúko oqarpoq.

AAMMA ATUARUK Mala Høy Kukop Atassut ilaasortaatitaarutikkaa

Facebookimi quppernermini allappoq taamatut aalajangernissani sivisuumik eqqarsaatigisimallugu. Maannalu qanoq pisoqassanersoq suli nalunarallarpoq.

- Attaviitsutut inissisimaqqaarallassaanga. Piffissap takutikkumaarpaa sussanersunga, KNR-imut taama oqarpoq.

Mala Høy Kúko naalakkersuisooqatigiinni 2016-imi ukiakkut taarserneqartuni pinngortitamut avatangiisinullu naalakkersuisuuvoq. Kim Kielsenilu naalakkersuisunik taarsiimmat Atassut naalakkersuisooqatigiinnit peqataajunnaarsinneqarpoq, Demokraatillu peqatigalugit illuatungiliuttunngorluni.

Mala Høy Kúkop tunuarneratigut Atassut Kommuneqarfik Sermersuumi Inatsisartunilu ilaasortaatitaqarunnaarpoq.