Makrelit, arferit puisillu oqaluuserineqassapput
EU-p aalisarnermut imarsiornermullu kommisæriat Maria Damanaki ukioq manna Nunatsinniimmat Nunatsinni arfanniartarneq puisinnartarnerlu tapersersorumannginngereerpaa. Taassumalumi isummersimanera EU-mi inatsisartui ataatsimeeqataalerunik attatiinnassagaat ilimagisariaqarpoq. Nunat Avannarliit Killiit siunnersuisoqatigiivisa sinniisaat tassaassapput siulittaasunngorlaaq Josef Tuusi Motzfeldt, tullersortaalu marluk, Islandip inatsisartuini Alting-ini ilaasortaq Olina Porvardardottir kiisalu Henrik Old, Savalimmiormiut inatsisartuini Lagting-imi ilaasortaq, taakku Reykjavik-imi Avannaata Illuutaani ullut pingasuni ataatsimeeqataassapput.
- Siorna Nuummi ataatsimiinnerput ajoriinnagassaanngilaq, taamanimi uagut puisinniartarnerput paasinnilluarfigalugu pipput, EU-milu inatsisartuni tusarniaasoqarneranik kinguneqarsimalluni. Taamanimi ataatsimeereeratta EU-mi inatsisartuni ilaasortat uagut piniartaatsivut nutaamik isummerfigaat, tassalu puisinniartarnermut isiginnittaasiata piviusorsiornerulersimaneranik kinguneqarsimalluni. Taamaammat ullumi ataatsimeereerutta suli piviusorsiorpalunnerusumik isummersortalernerinik kinguneqarnissaa neriuutigaarput, Nunat Avannarliit Killiit siunneruisoqatigiivini generalsekretæriusoq Tordur Torarinsson oqarpoq.
Aamma makrelilerngusaanneq, EU-p aalisarnermut inatsisaata nutarterneqarsimanera, kiisalu silap pissusaata allanngoriartornerata Nunat Avannarliit Killerni ilaasortaasa pingasuusut maanna atugarileruttugaat eqqartorneqassallutittaaq. Makrel-ilerngusaannermulli tunngatillugu generalsekretæri isumalluarpallaanngilaq:
- Norgemiut EU-miluunniit nunat ilaasortat uagut makrelinik pisaqarnerusalerusunnerput tusaajumanngerluinnaraat nalunngikkaluarparput, naapertuilluarnerulli aqqani tamakku qaqilissallutigit. Ilami makrelit Islandip imartaani immaqalu Kalaallit Nunaata imartaani suffisalersimaneri piviusuupput, tassalu makrelinik pisaqarnerulersinnaanissatsinnut pissutissaqarluarnitsinnik takussutissaasuullutik. EU-mili ministeriusut Tuluit Nunaanni qanittukkut ataatsimiimmata isumalluaatissaqartilinngilaatigut, tassami akerliunertik uteriiserlutik attatiinnarmassuk. EU-mili inatsisartuini aalisarnermut ataatsimiititaliami siulittaasoq Pat Gallagher sunnerniarsarissavarput, uagullu isummersuutitsinnik tusaaniarnerulernissaa neriuutigalutigu, Tordur Torarinsson knr.gl-imut taama nassuiaavoq.