Makivik: Piita Aatami tallimassaa siulittaasunngoqqippoq
Makivik Nunavimmi aningaasarsiornikkut, inooqatigiinnikkut naalakkersuinikkullu ingerlatsiviuvoq.
Siulittaasussamik qinersineq eqqissiviilliorfiuleraluarpoq, tassami Piita Aatami siorna siulittaasutut sulinerminut atatillugu, aningaasanit sinneqartoorutinit immikkut 3 millionit koruunit missaannik akissarsisinneqarmat. Siulersuisunut ilaasortat aamma immikkut akissarsisinneqarput.
Apeqqutit immikkut akissarsisitsinermut tunngasut Piita Aatamip siulittaasumut qineqqusaarnermini akissuteqarfigai, oqaatigalugulu taakkua ukiorpassuarni suleqataasimanermut akiliutaasut, Nunavimmiullu aningaasassaannit tigusisoqarsimanngitsoq. Aamma Makiviup naatsorsuutaani takuneqarsinnaasutut siorna aningaasatigut isaatitsisoqarsimavoq, naak aningaasarsiornikkut ajornartorsiortoqaraluartoq. Taamaalillutik Nunavimmiut tattiginnillutik siulittaasussaminnik qinerseqqipput.
Nunavimmi nerisassanut ulluinnarnilu pisariaqartinneqartunut aningaasartuutit qaffasinnerujussuat ajornartorsiutinut annernut ilaavoq. Piita Aatami Canadami nunap immikkoortuata Quebecip naalakkersuisuinit pisiassat akiinut apparsaatissanik 60 millionit koruuninik pissarsereerpoq. Taassuma qineqqusaarnermini Quebecip naalakkersuisuinit aningaasanik amerlanerusunik pissarsiniarnissaq neriorsuutigaa, Nunavimmiut taamaalillutik akikinnerusunik pisiassaqalerniassammata. Aamma utoqqarnit atorneqarsinnaasunik nunaqarfinnut aputaajaatinik pisisoqassaaq. Aamma Nunavimmiut ukiumut marloriarlutik timmisartumut bilitsinut 75 procentit angullugit akikillisaavigineqartassapput. Tamakkua saniatigut Makivik nunaqarfinni mersortarfeeqqanik iluarsaassisarfeeqqanillu pilersitsiniarpoq, inuit aningaasaqarnerannut iluaqusiisussanik immaqalu nunaqarfimmiut aningaasarsiorfigisinnaasaaannik.
Piita Aatamip qineqqusaarutaani pingaarnerpaapput, inuusuttut ilinniarnissaannut pitsaanerusumik periarfissarsiuusserusunnera, suliniutinullu inuusuttunut tunngasunut pitsanngorsaaniarnera, soorlu timersornikkut nutaanik periarfissarsiuussinikkut.
