Makivik inuusuttunik takornarialerinermik ilinniartitsissaaq
Makiviup sanaartortitsiviit arlallit timmisartortitseqatigiiffiillu marluk pigereerpai. Maannalu suleqatigiiffiup umiarsuarsuarnik takornariartitseqatigiiffimmut Cruise Northimut piginneqatigiissutit 75 procentii pigilerpai.
Taamatut suliniuteqarneq Makiviup aningaasarsiorfissaannartut isiginngilaa, aammali matumani naggueqatigiit Inuit inuusuttaannut nutaanik suliffinnik periarfissiissalluni. Suleqatigiiffiup Nunavimmiut inuusuttut qulit imaluunniit 20-t aasat tamaasa umiarsuarni ilaasunik sullissisutut ilinniartittassavai, matumani ilanngullugu umiarsuarnik takornariat naggueqatigiit Inuit kulturiannik pinngortitamillu qanoq oqaluttuussinnaanissaat ilanngullugit. Tamanna takornariat inuusuttunit sullinneqarnerminnik nuannaarutiginninnerannik kinguneqassaaq, aammattaarli inuusuttut takornariartitsineq pillugu paasisaqassallutik.
Tamatuma saniatigut umiarsuaq Makiviup takornarianik angallassissutaa, Cruise North, Nunavimmi aamma Nunatsiavummi nunaqarfinnut sinerissamiittunut iluaqutaassaaq. Takornarianik angallassineq sioqqullugu nunaqarfimmiut, takornarianik qanoq tikilluaqqusisarnissaannik, kulturikkut qanoq takutitsisoqarnissaannik aamma takornarianut sanalukkanik qanoq tuniniaasinnaanerannik ilinniartinneqartassapput. Nunaqarfimmiut takornarianik isumaginninnerat pillugu Cruise Northimit akilerneqartassapput.
George Berthe, Makiviup suliniutaanut pisortaasoq Radioaviisimut oqarpoq, Makiviup taamatut suliniuteqarneratigut Makivik kisimi iluaquserneqarani inuusuttut Nunavimmiut aamma nunaqarfiit Nunavimmiittut Nunatsiavummiittullu iluaquserneqassasut.
