Majuartarfiit tummerartaat tuniniarneqarput

Ilisarnaatiliornissaq 741.000 koruuninik missingersuusiorneqareerpoq, suleqatigiillu pilersaarutigaat aningaasat pissarsiariniarlugit majuartarfilioriarluni taakku tuniniarneqassasut.

Nasiffiup tikinnissaanut 292-inik tummerartalinnik majuartarfiliortoqassaaq. Oqaasinnaaq "illoqarfiup isikkiviginnerpaavanut majuartarfissigit" atorlugu, illoqarfimmi inuussutissarsiutillit allallu tummeqqamik ataatsimik arlalinnilluunniit pisinikkut suliniummut tapersersuinissamik periarfissinneqarput.

Tummeraq ataaseq 1.000 koruunimik akeqartinneqassaaq.

Kalerriutigineqartartut pissarsiareriikkat naapertorlugit illoqarfimmiut isumassarsiaq tapersersorluaraat malunnarpoq.

Illoqarfimmi inuussutissarsiortut ilaat, kukkunersiuisoq Bent Kragh, tapersiiniarluni neriorsuereerpoq. Taanna ima oqarpoq.

- Nasittarfik illoqarfimmut kommunimullu iluaqutaassaqaaq, aamma illoqarfimmiunut angalaarfissaqqissuussaaq. Taamaammat suliniut sulisumut ataatsimut 2.000 koruuninik, katillugit 10.000 koruuninik, tapersersorusupparput, neriorsuillutalu majuartarfik ukioq-manna naammassissappat, aningaasat marloriaatinngortissallugit.

Borgmester Simon Simonsen ima oqarpoq:

- Nutaarluinnaasumik, isumassarsiorluarsinnaassuserlu atorlugu, aningaasanik katerseriaasiuvoq, naak Inuussutissarsiornermut Suliffeqarnermullu ataatsimiititaliaq nasiffissamut 60.000 koruuninik tapiissuteqareeraluartoq, nammineq piumassutsimik suliniut kusanartoq kommunip tapersersorpaa, aterpullu tummerarpaalunnguani soorunami takussaatikkusupparput.