Majorallattarfik 3 millionit koruunilik
Ineqarfinnik sanaartornermi maleruaqqusaavoq, kaassuarluni ingerlavigineqarsinnaasumik isaarissap tungaanut sanasoqartassasoq, tamannalu kommunit malittariaqaraat allassimalluni.
Ilinniartut inissaata isaariaata tungaanut kaassuarluni aqquteqassannginnera ilinniartumut ataatsimut ajornartorsiutaassaaq.
Majorallattarfimmik sananissaq Qeqqata Kommunianut 3 millionit koruuninik akeqartussaasoq oqaatigineqarpoq.
Illoqarfiup ilaani allani atorfissaqartitsinerusunut aningaasat atorneqarnissaat kommunip siunniukkaluarpaa, tassalu orniguttarfinnut pioreersunut kaassuartunit pitsorluttunillu ullumikkut atorneqartartunut aningaasaleerusunnerupput.
Maleruaqqusat atuuttut kommunit malittussaagaat Ineqarnermut, Angallannermut Attaveqaateqarnermullu Pisortaqarfiup aalajangiusimavaa:
-Sanaartornermi maleruaqqussutit atuuttussaapput. Maleruaqqusaavorlu majuartarfiit saniatigut ajornanngitsumik majorallattarfeqarssasoq, Ineqarnermut, Angallannermut Attaveqaateqarnermullu Pisortaqarfimmiit Klaus G. Hansen oqarpoq.
Qeqqata Kommuniata pisortaata Laust Løgstrupip taama aalajangiisoqarnera ajuusaarutigaa.
- Tamanna tusaatissatut tiguarput. Aningaasat allanut pisariaqartitsinerusunut atorsinnaagaluarpavut, soorlu timersortarfeeraliornermut, Løgstrup oqarpoq.
