Magnus Larsen Nunat Avannarliit Siunnersuisoqatigiiffiata nersornaasiuttagaanut innersuunneqartoq
Atuakkiortoq, naqiterisitsisartoq, provsti soraarneq Magnus Larsen Nunat Avannarliit Siunnersuisoqatigiiffiata atuakkanik nunanit avannarlerneersunik nersornaasiuttagaanut 2018-imut innersuunneqarpoq.
Magnus Larsenip inuunera pillugu atuakkiaq pineqarpoq, "Illinersiorluni ingerlavik inussiviuvoq".
Taanna siorna saqqummerpoq kalaallisuinnarlu atuarneqarsinnaalluni. Soorlu Magnus Larsenip atuakkanik naqiterisitsisarfia kalaallisuinneq saqqummersitsisarnerasut.
Atuakkami 1963-imi 1975-imilu pisimasut uterfigineqarput Magnus Larsenillu inuunera pillugu atuakkiamit siullermit nanginnerulluni.
Magnus Larsen 1963-imi palasinngorpoq, palaseqarfiillu avannaani Qaanaamit kujataanut Qaqortoq ilanngullugu palasiuffigisimallugit. Najuqarfinnut nuuttaqattaarnerpaassuit Magnus Larsenip atuakkiamini ilaatigut isornartorsiuinera Nunat Avannarliit Siunnersuisoqatigiivisa atuakkanik nersornaasiuttagaanut innersuunneqarnerani nittartagaani atuarneqarsinnaavoq (danskisuinnaq allaqqavoq, aaqq).
Nunatta oqaluttuarisaanera nutaajunerusoq oqaluttuarineqartoq
Atuagaq inuup inuuneranuinnaq oqaluttuartuunngitsoq aamma eqqaaneqarpoq. "Inuunermik atuakkiaq kalaallit oqaluttuarisaanerannit eqqartuisoq taamatullu atuakkiortup oqartussat avannaarmiunik nuutsitsinerannut isiginninnera, amerikamiullu timmisartuat qaartartunik usisoq Pituffiup eqqaani nakkarneranik ilaatigut sammisaqartoq".
Magnus Larsen augustusip 29-ani 1931-mi Kitsissuarsunni inunngorpoq, piniartussatullu perorsagaalluni. Qulingiluanik ukioqarluni taallioqqaarpoq Namminersorlutillu Oqartussat kulturikkut nersornaasiuttagaanik 2014-imi tunineqarpoq.
Innersuunneqartup 86-inik ukiullip naqiteriviata 1987-imi pilersinneqartup atuakkiat assigiinngitsut saqqummersittarsimavai. Meeqqanoortuninngaanniit upperisarsiornermut tunngasunut.
Toqqagaasoq ukiaru saqqummiunneqassaaq
Nunat Avannarliit Siunnersuisoqatigiiffiata atuakkianut nersornaasiuttagaa 350.000 koruuninik aningaasartalik Nunat Avannarliit Siunnersuisoqatigiivisa ukiakkut ataatsimeersuarneranni Norgemi tunniunneqassaaq.
Nunat Avannarliit Siunnersuisoqatigiiffiata atuakkanik nunanit avannarlerneersunik nersornaasiuttagaa atuakkiornermik oqaatsinullu soqutiginninneq annertusarnissaa siunertaraa.
Nunat Avannarliit Siunnersuisoqatigiiffiata atuakkanik nunanit avannarlerneersunik nersornaataa meeqqanut inuusuttunullu atuakkianut, nipilersukkanut, isiginnaagassianut pinngortitarlu pillugu sulianut nersorinnissutit peqatigalugit agguaanneqartarput. Tamannalu Nunat Avannarliit Siunnersuisoqatigiivisa ukiakkut ataatsimeersuarneranni nunat avannarliit illuanni Reykjavikkimiittumi pisarpoq. Nersorinnissut 350.000 koruuninik aninagasartaqarpoq.
