Mafiami pisortarsuaq Iluliaq Waterimik imersuataassaaq

Amerikamiut filmiliaanni oqaaseq product placement atorneqaraluattuinnarpoq. Product placement ima paasineqarsinnaavoq, ussassaarineq isertortoq filmip ilaanit takutillugu. Assersuutitut taaneqarsinnaapput James Bondip nalunaaqutaaraa Omega, BMW-sportvognit, Bang Olufsen-telefonit aamma PH-lampit.

Maannalu aamma kalaallit tunisassiaat akisooq, Iluliaq Water Ilulissaneersoq, Hollywoodimi filmiliami ilaasussanngorpoq.

Filminik ilitsersuisartoq Brian A. Miller, ilaatigut filmimik "Caught in the Crossfire"-imi ilitsersuisuusimasoq, ima kalaallit ernganik sermimeersumit nuannarinnitsigilersimavoq filmiliamini tullermi ilaatikkusulersimallugu.

Brian A. Millerip Iluliamik tuniniaasartoq Michiganinimiittoq, attaveqarfigisimavaa aperalugulu isiginnaartitsisartuminut imermik pisisinnaanerluni. Tassanilu isumassarseriasaarpoq:

- Manuskriptimi takuaa piffissap ilaani mafiami pisortarsuaq imermik imersuaartoq. Imeq puaasaliortoq atorneqartussaasimagaluarpoq, taavali Brian Miller isumassarseriasaarsimavoq: Soormi "Iluliaq" atorutsigu ilisarnaataami erngusertaalu kusanarnerupput tulluarnerullutillu.

Taama Iluliaq Waterimi pisortaq Julien Caquineau oqaluttuarpoq.

Maannalu isumaqatigiissutaalerpoq Iluliaq-water filmimi ilaassasoq, tunisassiortullu filmimi inuttaasut Iluliaq-mik imigaqarnissaat isumagissavaa.

Ileqquugaluarpoq filmimut ussassaarutinik ilanngussiniaranni tunisassiortup annertuumik akiliuteqartarnera. Taamaattorli Julien Caquineaup nuannaarutigisaanik uani taamaanngilaq:

- Siullermik eqqarsarpunga: Qassinimmi akiliisitsiniarpat? Nalinginnaasuuvormi tunisassiap filmimut ilaatinnerani akiliuteqartarneq. Taamaattumik tupaallappunga akeqanngitsumik ilaatinniarmassuk.

Sapaatip akunnerani uani tuniniaasup filimiliortullu akornanni isumaqatigiissut atsiorneqassaaq, tassanilu aamma aalajangerneqassalluni filmimi inuttaasup mafiami pisortarsuup "Iluliaq Water" oqaasinngorlugu taassaneraa.

Maannakkulli nuannaarutigiinnarpaa suliniutip ussassaarutigineqarnissaa.

- Ussassaarutaavoq pitsassuaq. Filmit ussassaarutigalugit tamatigut pitsaasuusarput inuppassuarnit takuneqartarmata. Kingornagullu suli amerlanernit takuneqarnissaa siunertaralugu DVD-liarinissaa pilersaarutaalluni. Tassa ussassaarineq pitsassuaq akeqanngitsoq, Iluliaq Waterimi pisortaq, Julien Caquineau, oqarpoq.

Filmi 'House of the Rising Sun', ilaatigut Dominic Purcell-imit inuttaaffigineqarluni, novembarip 30-iani immiunneqarluni aallartissaaq.