Maersk Oil qillerivimmi BP aqutsisuussaaq

Imartaq uuliasiorfissaq itisuujuvoq, BP-p Mexicop kangerliumanersuani qilleriviani ittumik qillerisoqassalluni.

Uuliasiortut BP-kkut tassani qillerivianni Macondomik taaguuteqartumi uuliamik upernaaq maqisoortoqarpoq, A.P.Møller-Mærskilli tamanna ernumanartoqartinngilaa.

Maersk Oilip qillerinernut aqutseqataasussaanera ilaatigut eqqaallugu, A.P. Møller-Mærskip pisortaanerata Niels Smedegaard Andersenip qillerinissat ernumanartoqartinngilai.

- Macondomi pisut soorunami malinnaavigaavut, uagullu taamatut ajutoorsinnaasimanissarput ilimaginngilara. Qillerinerummi nalaani qanoq periusissat uagut aqutsisooqataaffigissavavut, Niels Smedegaard Andersen nutaarsiassaqartitsivimmut Ritzauimut oqarpoq, nangillunilu:

- BP suliaminut tunniusimasuuvoq, pikkorillunilu. Nordsømilu qillerinitsinni arlalitsigut suleqatigigatsigit qularutiginngilara maqisoortoqaqqinnissaa sapinngisartik tamaat pinngitsoortinniassagaat, Smede Andersen oqarpoq.

Maersk Oil Brasiliami qillerinissamut 14 milliardit koruuninik aningaasaliiniarpoq, SK Energy Companyp Brasiliami immikkoortortaqarfianik pisinikkut qillerisoqalissalluni.

Maersk Oilip uuliasiornerminut atatillugu Brasilia pingaarnersanngortinniaraa, Maersk Oilip pisortaanerata Jakob Thomasenip Ritzauimut oqaatigaa.