Maersk Nunatsinni uuliasiornissaminut piareersarpoq

Cairn Energy Nunatta sineriaata avataani uuliasiorluni qillerinermini iluatsitsivallaanngilaq, tamannali uuliasiortut allat soqutiginninnerannik allanngortitsinngilaq. Kalaallit Nunaanni uuliasiornissamut piareersartut ilagaat, Maersk, business.dk allappoq.
maajip 07-at 2013 07:58

Upernaviup avataani Baffin Bugtimi uuliasiornissap avatangiisitigut aningaasatigullu illersorneqarsinnaasumik ingerlanneqarsinnaanersoq pillugu aatsaat aappaagu aalajangiisoqartussaagaluarpoq, taamaattorli piareersaatit siulliit ingerlanneqareersimalerpoq. Maersk akuerineqassappat, immikkoortut akuersissutigineqarsimasut ilaanni ukiuni 2014-imit 2017-imut qillerisoqassaaq.

Nunattali sineriaata avataani uuliasiornissaq akisuupilussuusinnaavoq. Sumiiffimmi pineqartumi qillerineq ataaseq 1 mia. koruunit angullugit akeqariaannaavoq, tamannalu pissutigerpiarlugu Maerskip uuliasioqatigiiffiit allat immikkut ilisimalittai suleqatigalugit sumiiffimmi uuliasiorluni qillerinissamut akuersissuteqarfiusumi pissutsinik sukumiisumik misissueqqissaarinissaq sulissutigaa.

Sajuppillatsitsisarluni siorna aasaanerani 3-D-mik misissuisoqarpoq, sumiiffik 1.850  kvadratkilometerisut angitigisoq qulaajaaffigineqarluni. Cairnip piffissami 2010 -11-mi Ilulissat eqqaanni misileraalluni qillerinermut aningaasanik milliardinik atuivoq, ilutsitsinanili.

Kalaallit Nunaata kitaata sineriaata avataani annertoorsuarmik uuliaqarnera qularutissaanngilaq. USA-p ujarassiuutut mississuisuisa Kalaallit Nunaata kitaata sineriaata avataani uuliamik gassimillu nappartat 17 milliardit nalinginut nassaassaqarnera missiliorpaat. Sumerpiarli nassaassaanersut, tassa nalunartua.