Maersk Janice tunisassioqqusaajunnaarpoq
A.P.Møllerip suliffeqarfiussuisa ilaat, uuliasiorfik Maersk Janice, Nordsømi Tuluit Nunaannut atasumi imartamiittoq, Tuluit Nunaanni Sullivinnik Nakkutilliisoqarfimmit, HSE-mit, takusarneqareerluni tunisassioqqusaajunnaarpoq.
decembarip 19-at 2007 17:31
Suliffeqarfissuup matuneqarneranut tuluit peqqutaanerarpaat isumannaallisaanermut tunngassuteqartut amigaateqarnerujussuat, tassamigooq suliffeqarfissuarmi tassani isumannaallisaanermut atortut 40-nit amerlanerit aserfallatsaalineqarsimanngillat.
-Isumannaallisaanerup pitsaasup anguneqarnissaa pinnagu, aningaasanik isertitaqarnissaq Maersk-ip pingaartinneruvaa, tunngavilersuummi allassimavoq.
Uuliasiorfissuarmi Janice-mi uuliamik ullut marluk ingerlanerinnaanni marloriarluni aasaq aggustip qaammataani aniasoqarpoq.
