Mælkebøttecenteri naalungiarsunnut immikkoortortaqarfittaartoq

Nerriviit, tamulugassat ballonnillu naalungiarsunnut immikkoortortaqarfiup ammaanersiorneqarnissaanut sulisut piareersaleruttorpaat.

- Ukiorpassuarni pilersaarutaavoq Projekt Ailinngortumik ammaassalluta ulloq unnuarlu angerlarsimaffissamik inissittarfissamik ungaavaqqanik, Mælkebøttecenterimi pisortaq Nuka Fleischer oqarpoq.

Naalungiarsuit pingasunit ukiullit Mælkebøttecenterimi arfineq-pingasut ulloq unnuarlu ullumimiit paaqqutarineqarsinnaanngorput.

- Aperineqartuartarpugut, pisortaqarfinniit, kommuniininngaanniit meeraaqqanik paarisaqarsinaanerluta . Taava paaqqutaralugit aamma ernisarfinniit aperineqartarpugut. Naameertuartarsimavugut pingasunit ukiullit kisiisa paarisinnaagatsigit, taanna oqarpoq.

Maannali tamanna qaangiuppoq.

Angajoqqaat suleqatigineqarnerussasut

Naalungiarsunnik paaqqinnittalerneq kisimi pinngilaq, angajoqqaammi peqataatinneqalerneranik malitseqassaaq. Angajoqqaallu meerartik peqatigalugu katsorsarneqarnissaat aamma neqeroorutaassasoq taassuma ilanngullugu oqaatigaa.

- Upperilluinnarparput meeqqat inissinneqarsimagaluarinilluunniit angajoqqaaminnut qanilaarneq attaveqarneq paariinnaraangamikku peqqinnerusartut. Kusanarnerusumillu peqqinnarnerusumik peroriartortartut, Nuka Fleischer oqarpoq.

Angajoqqaat attaveqatigilluarneri suleqatigilluarnerilu kinguneqarluarnissaa pisortap neriuutigaa:

- Neriuutigaarput ukua meeqqat angerlarsimaffiup avataanut inissinneqaraangamik angajoqqaaminnut angerlaqqinnissaat qaninnerussasoq. Angajoqqaat qanimut suleqatiginerani ilaatinneqarnerunerini taavalu angajoqqaat nukittorsarnerunerani siunnersorneqarnermikkut neriuppugut meeqqat inissinneqartut angajoqqaaminnut uteqqittut amerlanerulissasut, taanna oqarpoq.

Tuaviortumik inissiipallanneq pinaveersaartinneqassasoq

Naalungiarsuit ulloq unnuarlu angerlarsimaffimmut inissinneqartut, angajoqqaarsianut imaluunniit ulloq unnuarlu angerlarsimaffinnut assigiinngitsunut arlaleriarlugit inissinneqartarsinnaanerat pinaveersaartinniarlugu allaanerusumik suleriuseqassallutik pisortap ilanngullugu oqaluttuaraa.

- Ungaavaqqat tigusagut neriuutigaarput pisariaqartitaat kinaassusaat siusinaarnerusumik takusinnaalissagigut. Taavalu pinaveersaartillugu ilaatigut massakkut ulloq unnuarlu angerlarsimaffimmi inissinneqartartut imaluunniit angajoqqaarsiani inissinneqartartut arlaleriarlugit inissinneqartoortarput kukkusumik tulluarsagaanngitsumik inissinneqartarlutik, Nuka Fleischer oqarpoq.

Naalungiarsuk angajoqqaaminut angerlassanngippat, angajoqqaat meeqqallu pisariaqartitaat aallaavigalugit tulluarsaallutik kommuninut allagaqartassallutik tamatumalu kingorna aalajangiiffigineqartassasut taassuma oqaatigaa.

- Taamaalilluta meeqqap inissinneqaqattaarnissaa imaluunniit inuunermini kipisaqattaartumik nooqattaarnissaa pinaveersaartillugu.

Mælkebøttenip immikkoortuini assigiinngitsunimeeqqat ulloq unnuarlu maanna paarineqartut 23-upput. Taakkunannga naalungiarsuit marluk aamma paarineqalereertut Mælkebøttenimit oqaatigineqarpoq.