Mads Lumholtip anngunnissani neriuutigaa
TV-2-mi erinarsorluni aliikkusersuineq AllStars aqagu tv-kkut aappassaanik takutinneqassaaq.Taamaattorli Julie Berthelsenip erinarsoqatigiivini pingaarutilimmik inissisimasoq Mads Lumholt, nalunaaquttap akunnerini makkunani suli Nunatsinniippoq.
Allattoq Elisa Isaksen
Islandimi qaqqap innermik anitsisup qullaatsitai pissutaallutik taassuma Danmarkiliarnissaa ajornartorsiutitaqarpoq, aqagulu erinarsoqataasinnaanera suli nalorninartoqarluni.
Mads Lumholt Danmarkimut apuukkusukkaluaqaaq. Nuummiit umiatsiamut ilaalluni ippassaq Sisimiuliarpoq, ualimullu qamuteralammut ilaalluni Kangerlussualiarpoq - timmisartorsuamik aqagu Københavniliartoqassagaluarpat ilaasinnaaniassagami.
Laarseeraq Skifte takornariartitsivimmiit Igloo Mountainimeersoq Kangerlussuarmut angallassisuuvoq. Paaasisavut kingulliit naapertorlugit Mads Lumholt Kangerlussuarmut apuutereersimavoq.