Made in Greenland - Indiamili suliat
Ilumoortorli tassaavoq tunisassiat ilaat Indiami, Portugalimi, Tyrkiiami Polenimiluunniit suliarineqartarmata, aviisi Sermitsiaq ullumi saqqummersoq taama allaaserisaqarpoq.
Meqqi "Made in Greenland" atorneqarpat, salloqittaalluni usassaarinerusinnaasoq, Atuisartunut Unammilleqatigiinnermullu Aqutsisoqarfik isumaqarpoq, taannalu atorneqassappat puisit amiisa Kalaallit Nunaanni suliarineqarsimanissaat piumasaqaataassasoq oqaatigineqarluni.
Salloqittaallunili ussassaarisoqanngitsoq, Nunatta Ammerivia isumaqarpoq, tunisassiammi sumi tunisassarineqarnerat allassimasarmat.
- Tunisassiornerup sumi ingerlanneqarnera isertuussimanngisaannarparput, tamatuma saniatigut pisisartutsinnut uppernarsarusukkatsigu ammit atorneqartut maani Kalaallit Nunaanersuunerat pingaarnersaavoq, Nunatta Ammeriviani pisortaq Lars Berg Sermitsiami apersorneqarluni taama oqarpoq.
Aamma atuaruk Puisit amiisa tunisaalluarnerat Great Greenlandip nuannaarutigaa
Taama nassuiaateqartoqarnera Atuisartunut Unammilleqatigiinnermullu aqutsisoqarfimmit naammagineqanngilaq.
Aqutsisoqarfimmi pisortap Nikolaj Odgaard Jensenip tikkuarpaa, taski puisit amii atorlugit taskiliarineqaraangat angisuumik nalinga qaffattarmat.
Meqqit allanngortinneqarnissaat Nunatta Ammerivianit maanna eqqarsaatigineqarpoq.
- Pisisartutta kukkusumik paasissutissinneqarnissaat siunertarinngilarput, attaveqartarnerput pitsanngoriartinniarparput, tamanna piumasarineqarpat, Lars Berg Sermitsiamit taama issuarneqarpoq.
