Macronip Parisimi illoqarfinnilu innuttaasut aneqqusaajunnaarallartikkai
Frankrig peqqinnissakkut ajornartoorfiusutut naalakkersuisunit pingasunngornermi unnukkut nalunaarutigineqarpoq.
Illoqarfinni qulingiluani innuttaasut tamanna pillugu unnuakkut aneqqusaajunnaarallartinneqartut, Frankrigip præsidentia Emmanuel Macron tv-kkut aallakaatinneqartumi apersorneqarami oqarpoq.
Illoqarfiit pingaarnersaata Parisip saniatigut soorlu Lillemi, Lyonimi, Toulousemi Montpellierimilu innuttaasut unnuakkut aneqqusaajunnaarallartinneqarput.
Coronavirus inuit peqqissusaannut navianartutut nalilerneqarpoq.
AAMMA ATUARUK Parisimi napparsimmaviit coronavirusimik tunillanneqarsimasunik ulikkaaqqajaasut
Taamaammallu nappaatip siaruatsaalinissaanut iliuuseqartariaqarpugut. Frankrigimi naalakkersuisut præsidentip tv-kkut apersorneqannginnerani taama nalunaaruteqarput.
- Virusi kikkunnut tamanut navianarpoq tamanullu ilungersunartorsiortitsilluni, Macron tv-kkut apersorneqarnermini oqarpoq.
- Tunillanneqarsimasunut navianaannanngilaq. Aamma siusinnerusukkut tunillanneqarsimasunut 100.000-likkaanut navianarpoq. Amerlasuut kingunerluutigivaat kingunerluutigisinnaasaallu tamakkiisumik suli ilisimaqarfiginngilagut, præsidenti oqarpoq.
Illoqarfissuarni eqqorneqarnerpaasuni innuttaasut arfininngornermiit unnukkut nalunaaqutaq qulingiluaniit ullaakkut nalunaaqutaq arferngup tungaanut aneqqusaajunnaassapput.
Aneqqusaannginnermut peqqussut unioqqutikkaanni 135 Euronik tassa 1000 koruunit missaannik akiliisitaasoqartassaaq.
Illoqarfissuarni qulingiluani innuttaasut unnuakkut aneqqusaajunnaarnerat sapaatip-akunnerini sisamani atuukkallassaaq.
Neriniartarfiit imerniartarfiillu matoqqassapput ikinngutigiillu katersuussinnaanngikkallassallutik, Macron oqarpoq.
