Macbeth Kalaallisut
Immaqa taamatut oqartoqassaaq, Shakespearep isiginnaagassiaani Macbeth-ip nuliami toqunera inuunerullu isumaqannginnera maalaarutigigamiuk. Isiginnaagassiaq arfininngornermi novembarip ulluisa quliganni sapaammilu aqqarngani Katuap inersuaaraani takutinneqassaaq.
Ukiut 400-t matuma siorna isiginnaagassiarineqarsimasoq kalaallisuunngorlugu Silamiut takutissagaat, Silamiut ittuat Svenn B. Syrin nalunaarpoq. Makka Kleistip kisimiilluni Macbeth isiginnaartitsissutigissavaa.
Macbeth generalimik, nuliaminit ilisiitsunillu ikiorneqarluni, pissaaneqarniarnermik ataqqineqarusunnermillu ingasaassilersumik oqaluttuaavoq.
Silamiut tusagassiutinut nalunaarumminni allapput ullumikkut assinganik pisoqarnera takuneqarluarsinnaasoq.
-Burmamiut generalit, Mugabe, Kim Jong-il allallu naalakkersuisut peqqarniitsut eqqaagaanni takutippaat naalakkersuisut peqqarniitsut oqaluttuarisaanermi suli utertuartut.
Taamaammat Skotlandimi kisermaassilluni naalakersuisumik oqaluttuatoqaq inuusuttunut tusartissallugu pingaartuuvoq, aqutseriaatsit qangarsuaq atuuttut suli ullutsinni atuummata.
