Maarmoriliup eqqaani imaq suli mingutsinneqarpoq

Maarmoriliup eqqaani imaq aqerlumik zinkimillu suli mingutsinneqarpoq, naak aatsitassarsiorneq ukiuni 20-ngajanni uninngareeraluartoq. Danmarkimi avatangiisinik misissuiffiup, DMU-p, Maarmoriliup eqqaanik alapernaannerminut atatillugu nalunaarusiaani kingullermi tamanna atuarneqarsinnaavoq.
septembarip 11-at 2008 17:23

2007-imi misissuinerup takutippaa, aqerlumik mingutsitsinissamut killissarititatut atuuttut ataateqqagai. Kisianni Affarlikasiani, Qaamarujummi taakkualu paanni uillut suli aqerloqarpallaarput. Taamaammat uillunik taakkunanngaanneersunik nerinissaq suli inassutiginartinneqanngilaq.

Aatsitassarsiorneq 1990-imili unitsinneqarmat immamik mingutsitsineq millerujussuarsimavoq. Affarlikasiata naqqanut eqqakkat aqerlumik mikisuinnarmik maanna seerisitsipput. Kisianni zink-imik suli seerisoqarput, taamaattorli aatsitassarsiortoqarneraniit minneroqisumik.

Aqerloq Kangerluup naqqaniittoq 1988-imut naleqqiullugu taamanernit 1000-terarterutaannavoq zink-ilu arfinilerarterutaannaalluni.

- 2007-imi misissuinerit takutippaat, Maarmorilimmi aqerlumik zinkimillu suli mingutsitsisoqartoq. Ukiulli arlallit kingulliit qiviariarutsigik, mingutsitsineq milliartupiloorsimavoq. Aqerlumik zinkimillu mingutsinneqarsimasut annikilliartuinnarput, maannalu Affarlikasia Qaamarujummi mingutsitsinermik malussarfissaanerupput, ilisimatooq DMU-meersoq Poul Johansen oqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq