Maarmorilik ukioq manna ammarniarneqarpoq
Aatsitassarsioqatigiit Angus & Ross tusagassiuutinut nalunaarummi allapput Maarmorilimmi aatsisatassarsiornissaq ukioq manna oktobarip qaammataani aallartinneqarsinnaanissaa ilimanartoq. Zinkimik, aqerlumik sølvimillu piiaasoqalernissaq pilersaarutigineqarpoq.
Allattoq Mads Lynge
marsip 31-at 2008 06:29
- Imminut akilersinnaasumik zinkimik aqerlumillu Kalaallit Nunaanni piiaasoqalernissaa ilimanarluarsinnaavoq, Angus & Rossip pisortaanera Nicholas Hall oqarpoq, nangipporlu:
- Soqutiginnittut assigiinngitsut ulluni makkunani oqaloqatigaavut aningaasaliisoqarnissaq matumani eqqarsaatersuutigineqarluni, piginneqataassutinillu niuertorput Fox Davies suleqatigalugu aningaasaliisussanik nassaarsinnaassaagut, Maarmorilillu ammaqqinnissaa ilimanarluni, Nicholas Hall oqarpoq.
Majuartaat Schweitzimeersoq pissarsiarineqareerpoq, sulisullu najugaqarefissaat qulakkeerneqareerluni. Maarmorilimmi aatsitassarsiornissamut atortussat pissarsiariniarlugit sulisussarsiornissarlu pillugu aatsitassarsiorfiup pisortaa Afrika Kujallermiippoq.
