Maarmorilik naammattunik zinkeqarlunilu aqerloqarpoq
Silap kissakkiartornera Maarmorillip ammaqqilerneranut peqqutaavoq, taamatut oqarpoq qaarusunnut pisortaq Tim Daffern.
Sermersuummi aanneratigut zinki aqerlorlu ukiuni 50-ini piiarneqarnissamut naammattoq anguneqarsinnaanngorsimavoq. Aatsitassaqartitsiviullu suli aalajangiiffiginngilaa piiaanerni tullinnguuttuni qaarusuit pioreersut 270 kilometerinik atitussuseqartut qaarusuliornikkut talleqqissanerlugit imaluunniit nunap qaavatigut piaasoqalissanersoq.
Piiaaffissarmi sermersuup eqqannguaniippoq. Sulisut 20-t ullut tamarluinnaasa qulimiguullip mittarfeeraaniit majuartarfikkoorlutik qaarusummut suliartortarput, soraaraangamillu qummukaqqittarlutik. Qulimiguuliup mittarfeeraa 750 meterinik quttitsigisumiippoq. Sulisut sinneri arfineq-pingasut allanik suliaqartuupput, soorlu igasuullutik, mekanikeriullutik timmisartortartuullutik sulisartuullutilluunniit, taakkualu tamarmik sivisuumik sulinissamut sillimareertussaapput.
- Ullut tamarluinnaasa akunnerit 14-it missaanni sulisarpugut, igasoq Herbert Weiss-Ravn oqarpoq.
Qaarusummi sulerulunnerup saniatigut qaarusummi sulisut aaneqarsinnaanatik utaqqinissartik sillimaffigisariaqarpaat. Arfininngornerullu ullaakkuani anorlerpallaaqimmat qulimiguulik qaqqaliarsinnaanngimmat sulisut ualinissaata tungaanut aaneqarnissaminnut utaqqisariaqarsimapput. Qaammatillu marlussuit qaagiuppata majuartaat naammassisimalerpat majuartaammik sulisut qummukarsinnaanngorsimassapput.
