Maarmorilik matuvoq
-Maarmoriliup ingerlatiinnarnissaanut aningaasassaarukkatta, Maarmorilik aasaq matusariaqarsimavarput, Angel Miningimi pisortaq Tim Daffern KNR-imut oqarpoq.
Pisortap erseqqissaatigaa suliaq ingerlaannarniarneqarmat piviusunngortinnissaanullu aningaasassarsiorneq neriunaateqarluarnerarpaa.
Ujarassiuut pingasut Maarmorilimmi ukiissapput, Maarmoriliup eqqaa misissoqqissaajutigalugu nakkutilliillutik ukiissallutik.
Tim Daffernip naatsorsuutigaa piiaalluni tunisassiortoqalertinnagu qaammatini 18-ini piareersaasoqartariaqarumaartoq.
Angel Miningip suleqatigaat nunaminertanik sanaartormillu suliallit EMJ Ilulissaneersut.
EMJ-imi sulisut Maarmorilimmi suliartik maangaannaq unitsikkaluarlugu suli isumalluarput.
–Maarmorilimmi sanaartugassanik ulikkaarpugut sanaassat katillugit 4.000 kvadratmeterit qalialersorlugillu nappartussaavagut, taamaammat aasaqqippat ulapissaqaagut, piginneqataasoq Bo Eriksen oqarpoq.
EMJ-ikkut ilaatigut 90.000 kubikmeteri qaartiterlugu imaartussaavaat nunap iluani tunisassiorfissaq, soorluttaaq Maarmorilik talittarfiliortussaagaa.
Ilanngutassiaq Maarmoriliup matuneqarneranut tunngasoq tamakkerlugu unnugu Qanoruumi isiginnaarneqarsinnaassaaq.