Maanna Doris Atlantikup avannaani suleqatigiikkusuummerpoq
Qineqqusaarnermi Siumut arlaleriarluni oqartarpoq Atlantikup avannaamiut suleqatigiiffianni peqataaniarnani. Taakku isumaqarput suleqatigiit suliassartik naammasereeraat. Maannali namminiilivinnissaq siunnerfigalugu suliniartoqalerpoq.
Siumup qaaqquai Sara Olsvig Inuit Ataqatigiinneersoq aamma Sjurdur Skaale Savalimmiuni Socialdemokraatineersoq.
- Qaaqqusissut tiguarput. Kisianni tassani aamma pineqarpoq Socialdemokraatinut ilanngutissasugut. Kisianni tassa taamaasiorsinnaanngilagut Socialdemokraatiunnginnatta, Sara Olsvig KNR.gl-mut oqarpoq.
- Kisianni nuannerpoq atlantikup avannaani suleqatigiinnissaq ujartorneqarmat. Aappaatigut tupaallaatigilaarparput qineqqusaarnerup nalaani Siumukkut arlaleriarlutik oqaatigisarmassuk Atlantikup avannaani suleqatigiit peqataaffiginiarnagit, Sara Olsvig oqarpoq.
Siumup siulittaasua Aleqa Hammond KNR-imut erseqqissaavoq Sara Olsvig Socialdemokraatit gruppeannut nuunnissaannut kajumissaarneqarsimanngitsoq.
- Atlantikup Avannaanit ilaasortat pingasuusut tamarmiullutik ataatsimeeqatiginissaannut qaaqqussummik tunivarput. Tamarmiullutimmi, IA ilanngullugu, naalakkersuisussanut isumaqatigiissuteqareerput - IA SF-imut isumaqatigiissuteqareernikoq ataqqilluinnarparput, Aleqa Hammond oqarpoq.
Doris Jakobsen Siumumeersoq aamma Sjurdur Skaale Savalimmiuni Socialdemokraatineersoq Socialedemokraatit gruppeanni ilaasortanngussapput. Sara Olsvig maanna København-imut ingerlaarpoq SF-mik suleqateqarnissaaq ilaatigut oqaluuseriartorlugu.
Atlantikup Avannaamiut suleqatigiiffiat pilersinneqarpoq Kuupik Kleistimit Inuit Ataqatigiinneersumit, Lars Emil Johansenimit Siumumeersumit kiisalu Høgni Høydal-imit Savalimmiuneersumit 2001-mi qinersinerup kinguninngua. Taamanikkut namminersorneq eqqunniarlugu suliniarneq anguniakkat pingaarnersaraat. Namminersorneq 2009-mi eqqunneqarmat Siumut suleqatigiinni ilaasortaajunnaarpoq. Maannalu tassa namminiilivinnissaq siunniunneqarpoq.
- Kissaatigaara namminiilivikkartornissamut sulineq ingerlaannassasoq nalunngilaralu Sarap Sjurdurillu tamanna aamma soqutigisarigaat, Doris Jakobsen suleqatigiinnissamut qaasaanermini allappoq.
Savalimmiuniit qinikkap aappaa Edmund Joensen Sambandspartiimeersuuvoq taassumalu talerperliit tapersersorpai.