Maani mæslingertoqanngilaq
Nunatsinni nakorsaaneq Flemming Stenz radioavisimut ilisimatitsivoq, nunatsinni mæslingertoqanngitsoq. Mæslingertoqalersimaneranik tusarsimanngilaq nalunaaruteqartoqarnaniluunniit. Nakorsaaneq isumaqarpoq meeqqat mæslingimut, savarnermut, qimmeralannermullu akiuussutissamik kapoorneqartarnerannut atatillugu nunatsinni meeqqat nappaataasa tunillaassuunnissaat pinaversaarneqartartoq. Tamatumani MFR-imik taasamik kapoorisarnermi atuarfiit peqqinnissaqarfiillu suleqatigiilluarnerat peqqutaanerarpaa.
Nappaat mæslingi tuniluutiasorujussuuvoq danskillu amerlanerujuatuinnartut anillallutillu kissarneqartorujussuanngorsimapput qaammatinilu aggersuni amerlanerit nappaammit eqqorneqarumaartut oqartussaniit nalilerneqarpoq.
- Pissutissaqanngilagut isumaqassalluta tuniluunneq qaangiukkiartulereersoq. Akerlianik siaruaakkiartorsorinarpoq, Statens Serum Institutimi - tassa naalagaaffiup nappaatinut akiuuussutissaleriffianni nakorsaaneq Steffen Glismann oqarpoq.
Akiuussutissaleriffimmiit nalunaarsuinerit naapertorlugit illoqarfiit pingaarnersaanni inuit 53-it aattortissimapput, 22 -it sjællandip sinneraneersuullutik, pingasut Danamarkip kujataaneerlutik ataaserlu Jyllandip avannaaneerluni.
1987-miilli meeqqat akiuussutissamik ilaatigut mæslingertunut akeqanngitsumik kapitinnissaminnut neqeroorfigineqartarput. Tamaakkaluartorli tuniluuttoqarsimappat meeqqat quliugaangata ataatsip kapitittannginneranik tamanna pissuteqarsinnaavoq.
- Tamatuma kingunerisarpaa ukiut ingerlanerini amerlanerujartuinnartut tunikllanneqarsinnaanerat. Tassaana taamatut ineriartorneq mianersoqqussutigisimagipput maannakkullu pisut eqqarsaatigalugit tuniluuttoqarnera tupinnanngilaq, nakorsaaneq Steffen Glismann oqarpoq.