Maani aamma inoqarpoq
- Periuseq nutaajuvoq, tigussaasuulluni issittumullu attuumassuteqarluni, Naalakkersuisut siulittaasuat Kuupik Kleist taama oqarpoq, isummallu allanngulernerannut ataqqinaat tigullugu.
- Silap avatangiisit pinngortitallu pissusaata pimoorunneqarnerunissaat ukiorpaalunngortuni uagutsinnut soqutiginartuusimavoq, issittorlumi aamma eqqarsaatigalugu naalakkersuinermi inissaqartinneqartariaqarpoq. Innuttaasullumi ineriartornissaq aamma pisinnaatitaaffigaat, Kuupik Kleist oqarpoq.
Pisuussutinik uumassusilinnik atuineq ingerlatsinerlu ilaatigut Nunat Avannarliit Siunnersuisoqatigiivinit isiginiarneqarnerulerpoq.
- Atugassarititaasut silap allanngoriartorneranit malunnaatilimmik allanngornerisa kingunerisaannik, pisuussutinik atuinermi ingerlatsinermilu periusissanik nutaanik nassaarniarlutik Issittumi naalagaaffiit naalakkersuisui annertuumik suliassaqarput. Ilaatigut tamakkuussapput Nunat Avannarliit Siunnersuisoqatigiivinit suliniutissatut aningaasalersorneqarsinnaasutut siunertalimmik qitiusumik sammineqartussat, Naalakkersuisut siulittaasuat oqarpoq.
Nunat Avannarliit Siunnersuisoqatigiivisa Issittumi Suleqatigiinnissamik suliniutaa aningaasanik 10 millionit koruuninik malitseqarnera siullermik Kalaallit Nunaata malugissavaa.
- Suleqatigiinnissamut suliniummi suliniutissatut qulequtarineqartunut assingusunik pilersaarutinut aningaasaliissutissanik immikkoortitsisoqareernikuuvoq, ilatigut ingerlatsinermut ilinniartitaanermullu atorneqarsinnaasunik, Kuupik Kleist oqarpoq.
Suleqatigiinnissamut suliniut Nunat Avannarliit Siunnersuisoqatigiivini, Christiansborgimi Folketingip Ataatsimiittarfiani aamma oqaluuserineqassaaq. Ataatsimiinnerullu sinnera soorunami KNR-mit aamma malinnaaffigineqassaaq.