Maangaannaq eqqaaginnartoqartassanngilaq

Pinaveersaartitsinermut piorsarsimassutsimillu suliniuteqarfik Narsami A-21 kingumut ukioq manna avatangiiserput atoqqiinerlu aallaavigalugit aaqqissuussiffiulerpoq. Eqqaavioli, atoqqiineq aallaavigalugu Tivoli, innuttaasunut saaffiginnissuteqarpoq avatangiiserput paarilluassagutsigu eqqaaginnaartoqassanngitsoq, taama oqarpoq Bolethe Stenskov, Narsami pinaveersaartitsinermi siunnersorti

-Una illu A21 aallartikkatigu suna tamaavimmi pisatavut, atoqqiinermik aallaaveqarlutik. Tassa aamma innuttaasunut paasitikkusukkatsigu, pinngortitaq paarilluassagutsigu, erligissagutsigu, nutaaginnavinnik pisiortorluta pisoqarsinnaanngimmat, eqqaanersuaq pivallaarunnaarniassagatsigu, Bolethe Stenskov nassuiaavoq.

Aamma pigisat atoqqillugit qanoq nuannertiginera aamma pigiinnaraluarlugilluunniit allanngortilaarlugit qanoq nuannertigisortaaq innuttaasunut paasititsiniutigineqassaaq.

A21-mi aallaaveqartumik eqqaavissuaq siorna qulequtaammat titartaasartoq Nuka Godtfredsen suleqataavoq. Ukioq manna kingumut qaaqquneqaqqippoq tamatumuuna eqqumiitsuliortoq Inuk Silis Høegh aaqqissueqataasussanngorluni qaaqquneqarsimalluni.

Atoqqiineq aallaavigalugu Tivoleqartitsinissaq sapaatip akunnerata tullia naallugu ingerlanneqassaaq.