Olsvig: Maalaaruteqarnissamik isumaqatigiittoqarsimanngilaq

Naalakkersuisoq Sara Olsvig KNR-imut oqarpoq, maalaarutaasinnaasut nammineq naalakkersuisoqarfimmini avatangiisinullu naalakkersuisoqarfimmit suliarineqarsimasariaqaraluartut. Taamaaliortoqanngilarli.
Assi © : KNR
maajip 17-at 2017 13:47

Naalakkersuisut siulittaasuat Kim Kielsenip Inatsisartunit ullumi apeqqarissaarfigineqarami oqaatigaa nunanut allanut tunngasunut naalakkersuisuusimasoq Vittus Qujaukitsoq, naalakkersuisut ataatsimoorussarinngisaannik, Naalagaaffiit Peqatigiinnut oqariartuuteqarsimasoq.

Vittus Qujaukitsup KNR-imut oqaatigaa sioorasaarineq nunanut allanut sillimaniarnermullu ataatsimiititaliamit taamani tunuliaqutserneqartoq, tamannali nunanut allanut sillimaniarnermullu ataatsimiititaliamit ilisarineqanngitsoq, ataatsimiititaliami ilaasortap Ineqi Kielsenip KNR-imut oqaatigaa.

Naalakkersuisut siulittaasuat Kim Kielsen ilanngullugu oqaatigaa nunanut allanut tunngasunut naalakkersuisup Suka K. Frederiksenip qanorpiaq ingerlasoqarsimaneranik nassuiaateqarnissaa naatsorsuutigigini.

Naligiissitaanermut naalakkersuisoq, Inuit Ataqatigiit siulittaasuat, Sara Olsvig KNR-imut oqarpoq, maalaarutaasinnaasut nammineq naalakkersuisoqarfimmini suliarineqarsimasariaqaraluartut, inuit pisinnaatitaaffii suliami pineqannguatsiarmata.

Maalaarulli Sara Olsvigimut anngunneqarsimanngitsoq, Olsvigip erseqqissaatigaa.

Suliaq avatangiisinut naalakkersuisoqarfimmi aamma suliarineqarsimasussaagaluarpoq, anngunneqarsimanngitsorli, Sara Olsvig KNR-imut paasissutissiivoq.

Taamaalilluni Sara Olsvigip Kim Kielsenip oqarnera uppernarsarpaa, tassalu Vittus Qujaukitsoq taamaaliornissamut pisinnaatitaaffilerneqarsimanngitsoq.

Naligiissitaanermut naalakkersuisup Sara Olsvigip, nunanut allanut tunngasunut naalakkersuisoq Suka K. Frederiksen oqaaseqartinnagu, suliaq oqaaseqarfigeqqikkusunngikkallarpaa.

Pisinnaatitaaffilerneqarani maalaaruteqarsimaneq qanoq kinguneqartinneqassanersoq utertinneqassanersorluunniit maanna apeqqutaaginnalerpoq.