Maaji Peqqissuutiguk Ilulissani soqutigineqarluarpoq

Maajip aallaqqaataaniit 16-ata tungaanut ullormut inuit agguaqatigiisillugu 77-it Maaji peqqissuutigumi aaqqissuussanut peqataasarsimapput.

- Maajip aallaqqaataaniit 16-at tikillugu inuit 1.150-it peqataasimapput. Tassa ullormut agguaqatigiisillugu 77-it peqataasarsimapput, Rigmor Villadsen, Maaji Peqqissuutigup ingerlanneqarneranut suleqataasoq oqarpoq.

Maaji Peqqissuutiguk Ilulissani ingerlanneqarnerani aaqqissuussat amerlanerit tamanit peqataaffigineqarsinnaasut ingerlanneqarput. Ilaatigut Utoqqaat Illuanni najugallit inuusuttunit kaassuarneqarlutik aneerunneqarput. Utoqqaallu peqatigiiffianniit aamma meeqqat meeqqerivinniittut timigissaqatigineqartarsimallutik.

Aaqqissuussalli timersorinerinnarmik imaqanngillat:

- Taavalu aamma uagut kalaallit illarumatuujugatta illarnersuarmik taallugu unnukkut ataaseq atorsimavarput. Assorujullu taanna aamma iluatsilluni, Rigmor Villadsen oqarpoq.

Maaji Peqqissuutiguk Ilulissani soqutigineqarluarmat, namminneq piumassutsiminnik aaqqissuisut pilersaarput, ataatsimiisitalioriarlutik aappagumut aaqqissuusseqqinniarlutik.

Aaqqissuisunit nalunaarutigineqarpoq ilaqutariikkaarluni marlunngorpat arpatsitsisoqassasoq. Tassa aanaakkut aataakkut ernguttallu iligiiaarlutik arpatsinneqassammata.