Maaji Peqqinnartuutiguk Nuummi ukioq-manna pissanngilaq
Aaqqissuussinerup aningaasartalerneqarnissaanut amigartoortoqarnera peqqutaasoq, Maaji Peqqinnartuutigumi aaqqissuisut sinnerlugit, Morten Jørgen Heilmann taama ilisimatitsivoq.
- Maaji Peqqissuutiguk aaqqissuunneqarnissaanut pilersaarusiortussat aningaasaliiffiginissaanut, ajoraluartumik amigaateqarsimavugut, Morten Jørgen Heilmann, Radioaviisimut taama oqarpoq. Taassumalu oqaatigerusunngilaa, aaqqissuussinerup ingerlanneqarnissaanut aningaasartuutissat amigaataasut qanoq amerlatiginersut.
Aaqqissuussisut sinnerlugit tusagassiuutinut ullumi nalunaarutigaa, Kommuneqarfik Sermersuup aningaasat tapiissutigisartakkani ikilerujussuarsimagai.
Ualigaa kommuni ilisimatitsivoq, Maaji peqqinnartuutiguk aaqqissuunneqarnissaanut 150.000 koruuninik immikkoortitsisimallutik. Piorsaanermut ataatsimiititami siulittaasup Mille Søvndahl Pedersenip, aaqqissuussinerup unitsinneqarnera uggoraa.
- Piorsaanermut ataatsimiititami nalilerparput aningaasat taakku tapiissutigineqartut atorlugit annertuumik aaqqissuussisoqarsinnaasoq, taamaattumillu ajuusarutigaarput suliniummi aaqqissuussisut ”Maaji peqqinnartuutiguk” 2012-imi Nuummi ingerlassinnaanngimmassuk, Mille Søvndahl Pedersen oqarpoq.
Maaji Peqqinnartuutiguk ukiuni tallimat kingulliit timersornernik aaqqissuussiffiulluni Nunarput tamakkerlugu ingerlanneqartarpoq. Siorna Nuummiinnaq, assigiinngitsunik 240-nik aaqqissuussaqarpoq, 20.000-inik peqataaffigineqartumik.
Aaqqissuussisut ullumi ilisimatitsipput, aaqqissuussineq ukiuni tulliuttuni ingerlanneqartarumaartoq neriuutigalugu, unitsitsinissamullu aalajangerneq oqitsuinnaannginnerarlugu.
