Inuit Ataqatigiit Múte Bourup Egede siuttoralugu nunatsinni Inatsisartunut qinersinermi taaguunneqarnerpaapput.Assi: Emil Helms/Ritzau Scanpix

Múte taaguunneqarpaavoq Kim Kielsenilu taaguunneqarnerpaat tulliulluni

Múte Bourup Egede Inatsisartunut qinersinermi 3380-init taaguunneqarpoq. Taakku taaguunneqarnerpaap tullianit amerlanerungaatsiarput.

Inatsisartunut kommunimullu qinersinermi qinersisartut 66 procentiinngajaannai marlunngornermi qinersiartorput.

Inatsisartunut qinersiartortut aatsaat taama ikitsigipput.

Taaguussinerilli qanoq agguataaqqappat? KNR-ip qinersisartut akornanni Inatsisartunut qinersinermi politikerit nuannarineqarnerpaat pingasut nassaarai.

1. Múte Bourup Egede: 34-nik ukiulik qinersinermilu taaguunneqarnerpaaq

 

Assi: Emil Helms/Ritzau Scanpix

 

Inuit Ataqatigiit partiianni siulittaasup, Múte Bourup Egedep partiip 11 procentinik siuariartup qinigaalluarnissaa qulakkeerpaa. Taannaannaanngilarli taassumami qinersinermi aamma taaguunneqarpaalluni oqaatigisinnaavaa.

Partiimi siulittaasoq inuusuttoq 3380-init taaguunneqarpoq. Tulliullutillu taaguunneqarnerit tassungaluunniit qaninngillat.

Kikkut tamarmik Múte Bourup Egede maanna ukaktaraat. Maannakkutummi Naalakkersuisussat inissitsinnernissaanut partii suliaqartuuvoq, isumaqatigiinniarnerillu qinersinerup aqaguani aallartinneqareerput.

IA-llu siulittaasua 34-nik ukiulik Naalakkersuisuni siulittaasunngussaguni siulittaasuusimasuni inuusunnerpaalissaaq. Tamannali nammineq iluaqutissaannartut isigaa:

- Piareersimavunga. Inuusuppunga - tamanna nukittussutigaara, Múte Bourup Egede qinersinerup unnuaani oqarpoq.

2. Kim Kielsen: Partiimi siulittaasuusimasoq Naalakkersuisunut siulittaasuusoq

 

Assi: Malik Brøns, KNR
 

Naalakkersuisut siulittaasorisimasaat, Kim Kielsen taaguunneqarpaat tulliuvoq. Taaguussinerit 1841-t taassuma aqqani taasipput.

Kielsenip nunarput 2014-imili siuttuuffigaa, taassumalu siulittaasooqqinnissani piareersimaffigalugu qasseeriarluni oqaatigaa, taamaattoqanngilarli.

Siumumi taaguunneqarnerpaaq amerlasuut malinnaaffigaat. Partiimimi taaguunneqarnerpaaq partiinut allanut isumaqatigiinniarnernut ileqquusumik siuttuusarpoq.

Maannali Inuit Ataqatigiit isumaqatigiinniartussaarpasipput, Siumulli partiini taaguunneqarnerpaasimagaluaruni isumaqatigiinniarnerit qanoq ingerlanissaat pissanganarsimassagaluarpoq.

Kim Kielsenimi partiiminni siulittaasumit Erik Jensenimit 1186-init taaguunneqartumit qinerneqarneruvoq.

Kielsen Siumumi siulittaasuuffimminnini Erik Jensenimit partiip nuna tamakkerlugu novembarimi ataatsimeersuarnerani taarserneqarpoq. Taassumalu kingornali partiip iluani assigiinngitsunik eqqissiviilliortoqarluni.

Erik Jensen nammineq siulittaasutut suli imminut isigalugu qinersinerup kingorna erseqqissaateqarpoq:

- Tulliani ukiut marluk affaata missaata qaangiunnissaanut tassa ataatsimeersuartoqaqqinnissaanut allanngortoqarnavianngilaq, Erik Jensen KNR-imut oqarpoq.

3. Hans Enoksen: Naleqqap siuttua Naalakkersuisunullu siulittaasuusimasoq

 

Assi: Christian Klindt Sølbeck/Ritzau Scanpix

 

Politikeritoqaq, Hans Enoksen taaguunneqarnerpaat pingajuattut inissippoq. Taanna 1471-init taaguunneqarpoq, naallu taaguunneqarpaat pingajuattut inissikkaluarluni kingullemrik Inatsisartunut qinersisoqarneranit taaguussinerit ikinnerungaatsiarput.

Naleqqammi siulittaasua taamani 2531-nit taaguunneqarnikuuvoq.

Hans Enoksen naalakkersuisuni siulittaasuusimallunilu Siumumi siulittaasuunikuuvoq, taassuma partii 2014-imi januaarimi qimappaa. Tassanilu Partii Naleraq pilersippaa, partiip aqqa Naleraq qinersisoqalermat atuilerpoq.

Hans Enoksen februaarimi uummamminik suliaritereerluni sulinngiffeqarpoq, tamannalu Inatsisartuni Ukiukkut ataatsimiinnermi peqataannginneranik kinguneqarluni.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat