Múte siunnersuut isornartorsiorneqartoq pillugu: Tukappoq

Anneruumik tukappoq.

Inuit Ataqatigiit siulittaasuata, Múte Bourup Egedep Naalakkersuisut siorna decembarimi siunnersuutaat pillugu oqarpoq.

AAMMA ATUARUK Siunnersuut Tiliumit isorineqartoq: Sipaarniarneruvoq

Namminersorlutik Oqartussat oqaaseqartartut inuillu pisinnaatitaaffiinut siunnersuisooqatigiit inuit pisinnaatitaaffiinut ataatsimiititaliamut katersorusuppaat, tassanilu nunatta inuit pisinnaatitaaffiinut siunnersuisooqatigiivisa aamma inuit innarluutillit, utoqqaat meeqqallu illersuisuata ataatsimoortillugit.

Ataatsimoorfimmik ingerlatsivimmillu nukittuumik pilersitsineq inuit pisinnaatitaaffiinik suliaqarnermut illersuillunilu siuarsaataassasoq, tunngavilersuutigineqarpoq.

Taamali isumaqarneq innarluutillit illersuisuata isumaqatiginngilaa. Christina Johnsenip siunnersuut sipaarniarnerunerarlugu isornartorsiupallappaa.

Illuatungiliuttunit partiit annersaat isornartorsiuisunut maanna ilannguppoq.

- Inuit Ataqatigiinninngaanniit isumaqarpugut suliaq una Naalakkersuisut annertuumik tukattumik suliarisimagaat. Aammalu susassaqartut qanimut peqatigalugit suliaasimanngitsoq takuneqarsinnaammat, Múte Bourup Egede KNR-imut oqarpoq.

Suliaqarneq tukattoq

Innarluutillit Illersuisuat, Inuit Ataqatigiillu siulittaasuat Naalakkersuisut siunnersuutaannik ilorrisimaarinninnginnerminnik kisimik oqaaseqanngillat.

Siumup siulittaasortaavata, Erik Jensenip kattussinissaq tapersernagu Siumup nittartagaatigut uissuummernartumik oqaaseqarpoq. Taamaalilluni nammineq parteeqatini – matumani Martha Abelsen ilanngullugu tapersernagu.

- Isumaginninnermut Naalakkersuisup Martha Abelsenip aammalu Peqqissutsimut Naalakkersuisup Anna Wangenheimip maanna ukiup naalernerani oqaluuserisassanngortitaannut Siumumit naammagisimaarinninnginnerput apuupparput, Erik Jensenip oqaaseqarnerani ilaatigut allassimavoq.

AAMMA ATUARUK Siumup siulittaasortaava: Kattuffiit kattunnissaannik piumasaqarnikuunngilagut

Taassuma siunnersuut suliffeqarfinni ataasiakkaani sulisunik soraarsitsisariaqarnermik kinguneqassasoq nalilerpaa.

Naalakkersuisuutitaqartullu partiianni Siumumi isumaqatigiinnginneq taanna suliaqarnermut tukatsitsisoq, Múte Bourup Egede isumaqarpoq.

- Nalorninerup suli annerulerneranik inuiaqatigiinni aammalu oqaaseqartartut aamma siunnersuisooqatigiit pineqartut akornanni annerulersippaa. Naalakkersuinikkut massakkut kiap sammivik suna aallaavigalugu siunnerfimmik aqagumik tigumminninnersoq nalornisitsinera annertusarneqaannarpoq. Naalakkersuisut siulittaasuat taamatullu naalakkersuisut imaluunniit partiip siumup siuttortaava sorliinuku nunatsinni aqagumut tigumminnittut. Apeqqutit taamaattut massakkut inuiaqatiinni nalornisitsisut qaangerneqartariaqarput, Múte Bourup Egede oqarpoq.

Taassuma kattussisoqarnissaanut tusarniaanerup unitsinneqarnissaa politikerillu suliaq tamaat aallaqqaataaneertissagaat kaammattuutigaa.