34-nik ukiulik Múte Bourup Egede nunatsinni naalakkersuisut siulittaasuusimasuni maannamut inuusunnerpaavoq.Assi: Malik Brøns / KNR

Múte Marienborgimi: Nunanut allanut tunngasuni sillimaniarnermilu oqaasissaqarnerorusuppugut

Naalakkersuisut siulittaasuat, Muté B. Egedep Danmarkimut Naalagaaffeqatigiit ataatsimiinnissaannut nunanut allanut tunngasunut sillimaniarnermullu politikki naalagaaffeqatigiit ataatsimeeqatigiinnissaanni eqqartugassaanni pingaarnersaapput.

Nunanut allanut tunngasunut sillimaniarnermullu politiki Kalaallit Nunaata Danmarkillu akunnerminni akerleriissutigileruttorneranni, Muté B. Egede Pele Brobergilu siullermeerlutik naalagaaffeqatigiinnermut ataatsimiittussanngorput.

Tamanna Mette Frederiksenip atuuffimminut atatillugu inaani Marienborgimi aqagu sisamanngornermi pissaaq.

- Nununanut allanut suleqateqarnermi, pingaartumillu suliassaqarfinni nunatsinni nammineq ingerlatarisatsinni namminiussuseqarluta ineriasaanissarput uagutsinnut pingaarnerpaajusussaavoq.

- Naalagaaffeqatigiit akunnitsinni naalagaaffeqatigiit iluani siuttuisa aqagu ataatsimiinneranni nunanut allanut sillimaniarnermullu politikki qitiussaaq, taannalu aallaavigalugu massakkut killiffiusoq unammilligassallu aamma tassaniittut oqaluuserisassanut ilaasussaapput, siger Múte Bourup Egede KNR-imut oqarpoq.

AAMMA ATUARUK Naalakkersuisut: 1,5 milliardit uagut susassarinngilagut

Muté Bourup Egedep Danmarkip ministeriunera naalagaaffeqatigiit ataatsimiinnissaat sioqqullugu kisimiilluni ullumi ataatsimeeqatigissavaa.

Naalakkersuisut Muté B. Egedemit siuttuuffigineqartut siuliminnit Kim Kielsenimit siuttuuffigineqartumit Danmarkimut Savalimmiunullu aporaakkumanerusutut maannamut pissuseqarput.

Assersuutigalugu Pele Broberg naalakkersuisutut illersornissamut nunanullu allanut tunngasunut politikkimut eqqarsaatigalugu Danmarkimut suleqatiginnikkusunnera mikinerusutut danskillu illersornissaqarfiata nunatsinniisitsiunnaarnissaanik nipeqartutut saqqummillattaavoq.

Taamaakkaluartoq Marienborgimi ataatsimiigiarnini naalakkersuisut siulittaasuata inerneqarluarnissaa naatsorsuutigaa. 

- Naatsorsuutigaara pitsaasumik, torersumik aamma inerititaqarfissarsiorfiusumik oqaloqatigiinnerit ingerlanneqassasut. Naalagaaffeqatigiinnermilu massakkut aaqqissuussaanitta tunngavigisai aallaavigalugit suli inerisaaqqinnissamik ilaatigullu uagut nunatsinni namminiussuseqarnerulluta nunanut allanut oqaloqateqarsinnaanermut suleqateqarsinnaanermullu periarfissagut annertusarneqassasut aamma naatsorsuutigaara, Múte Bourup Egede oqarpoq.

Mette qilanaartoq  

Ministeriunerup Mette Frederiksenip naalagaaffeqatigiit ataatsimeeqatiginissaanut qilanaarpoq.

- Kalaallit Nunaanni nutaanik Naalakkersuisoqalernerata kingorna lagmandi Naalakkersuisullu Siulittaasuat peqatigalugit naalagaaffeqatigiinni ataatsimiinnerup siulliup ingerlanneqarnissaa qilanaareqaara taamaasiornikkummi siunissami suleqatigiissutigisassagut illinilersorsinnaassagatsigik, Mette Frederiksen tusagassiuutinut nalunaarummi allappoq.

Naalagaaffeqatigiit ataatsimiinneranut uiggiullugu apeqqutit nunanut allanut, isumannaallisaanermut illersornissamullu tunngassuteqartut oqallisigineqassapput. Tassani nunanut allanut ministeri Jeppe Kofod, Inuussutissarsiornermut, Niuernermut Nunanut Allanut Silallu Pissusaata Allanngoriartorneranut naalakkersuisoq Pele Broberg, justitsministeri Nick Hækkerup, kiisalu illersornissamut ministeri Trine Bramsen peqataassapput.

Pele Broberg ulluni kingullerni aalassatsitsivoq. Danskimmi issittumi nakkutilliinisamut isumaqatigiissutaat Folketingemi partiit februaarimi akuerisaat 1,5 milliardit koruuninik aningaasartalik, nunanut allanut tunngasunut naalakkersuisup, Pele Brobergip nunatta akisussaaffiginngikkaa oqarpoq.

- Nutaat Naalakkersuisuusugut ersarissumik isumatigiinnikuugatta sakkulersorneq akiorniarlugu suleqatigiinniarluta. Taamaammat danskit qanoq eqqarsarnerat oqaasertalerniarnagu qangalili taanikuuarput, Pele Broberg KNR-imut ippassaq marlunngornermi oqarpoq.

Naalakkersuisut siulittaasuat tassunga tunngatillugu oqaaseqarusunngilaq. Pele Brobergili ullumi erseqqissaassuteqarumaartoq Múte Bourup Egedep oqaatigaa. 

 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat