Múte B. Egede tusagassiutinut: TV2 politiinut suliassanngortinneqassagunarpoq

IA-mi siulittaasuullunilu Naalakkersuisut siulittaasuata TV2 politiinut suliassanngorteriaannaavaa, piumasaraalu tamanna inatsisilerituumit misissorneqartariaqartoq, taassumalu pisoq ajutumeereriarnertut taavaa.

Taama aviisi Atuagagdliutit allaatiginnippoq.

Mute B. Egede TV2-mit utoqqatserfigineqaraluarpoq, tamannali naammaginngilaa.

Apriilip aappaani tv2.dk allaatiginnippoq, Mute B. Egede pisuutinneqarsimasoq aningaasatigut imminut iluaquserniarluni suliamut attuumassuteqarpallaarsimanerarlugu.

Allaatigisarlu saqqummiunneqarpoq qinersisoqarnissaanut ullut sisamat sioqqullugit, ilisimaneqartutullu IA ajugaavoq, Mute B. Egedelu Naalakkersuisut siulittaasunngorluni.

Apriilillu arfineq-aappaanni – tassa qinersinerup aqaguani – TV2 utoqqatserpoq.

- TV2 isumaqarpoq allaatigisap taamatut saqqummiunneqarnera kukkunerusoq, suliamullu  attuumassuteqarpallaartoqarneranik uppernarsaatissaqanngitsoq. Tamallu takkuanni kukkunerulluni aammalu Egede oqaaseqartinneqanngilaq. Allaatigisarlu taamaalilluni TV2-p saqqummiussaani pitsaassusilittut nalilerneqarsinnaanngilaq, TV2 taama paasissutissiivoq.

Naapertuilluartoqartariaqarpoq

Allaatigisaq maanna TV2.dk mit peerneqareerpoq.

- Naapertuilluartoqartariaqarpoq, Naalakkersuisut siulittaasuat Sermitsiaq.ag-mut oqarpoq.

- Allaatigisap tamanut saqqummiutinnginnerani oqaaseqartinneqanngilanga, saqqummiutereerneratalu kingorna aamma tv2-mut akissuteqarniaraluarama ajornakusoorlutik.

- Allaatigisap kukkusumik paasissutissiisimanera qinersinermut sunniuteqarnerlussinnaavoq immaqalumi aamma sunniuteqarnerlussimassaaq, oqarpoq.

Mute B. Egede naapertorlugu politinut suliassanngortitsinermi TV2-p pissusilersorsimanera nassuiarneqassaaq, politikkikkullu kinguneqartitsisoqassalluni.

”Kalaallit Nunaanni siuttunngorumalluni iluareqqusaartup nutaap sulianut marlunnut attuumassuteqarpallaarnini nassuerutigiumanngilaa”

Allaatigisaq taanna inuit qarasaasiakkut naapittarfiatigut aalassatsitseqaaq, allaatigisarmi imaqarpoq taamani 2018-mi Múte B. Egede Aatsitassaqarfimmi naalakkersuisuugallarami, namminersortutut suliffeqarfiutimini aningaasatigut imminut iluaqusersimasoq.

Napparsimanerarpoq soraarlunilu

Juuni qaammat aallartilaartoq Ekstrabladet allaatigisaqarpoq, TV2-p nutaarsiassaqartitsiviani aaqqissuisutut pisortaq Ulla Østergaard, oqaluttuamillu suliarinnittuusoq pisup kingorna napparsimalluni nalunaarsimasoq, maannalu aamma soraarsimasoq.

Mùte B. Egede allallu politikerit tamatuma kingorna naliliipput, oqaluttuap taamatut saqqummiunneqarnera Kalaallit Nunaanni tamat oqartussaanerannut sunniipiloriaraluarnerusoq.

TV2-mili nutaarsiassaqartitsiviup pisortaa Ulla Pors siusinnerusukkut tamatuminnga akerliliivoq oqarluni nunatsinni qinersineq akornuseriaraluarneqanngitsoq.

Taassuma aamma tusarfiup kiminngaanniit aallaaveqarsimanera oqaatigiumanngilaa.