Múte B. Egede tassaarsuaqarsinnaanera pillugu: Nunat sanilerisagut suleqatiginiarpagut
Tassaarsuaqaratarsinnaaneranut naliliinerup nutaap Karrat Kangerluata eqqaani najugaqartunut pitsaanngitsumik nutaarsiassartaqarpoq.
Qaqqaq ulorianartorsiortitsinerpaaq ataatsikkut sisuussagaluaruni tassaarsuarmik pilersitsisinnaavoq. Tassaarsuaqarnissaa aallaqqaammut ilimagisamit annertunerungaatsiarsinnaavoq.
Misissuinerit nutaat naapertorlugit nunaqarfik Niaqornat qarsunneqarsinnaavoq. Tassaarsuaqaraluaruni Qaarsunni inuit 113-it navianartorsiorsinnaapput, Uummannamilu peqqissaavik eqqugaasinnaalluni.
AAMMA ATUARUK Karrat Kangerluat pillugu naliliineq nutaaq: Innuttaasut 176-it piumagunik nuunnissamut neqeroorfigineqartut
Karrat Kangerluanni pinngortitap piliaanik ajunaarneqarsuaqarnera siullermeernavianngilaq. 2017-imi juunip ulluisa 17-ianni qaqqap sisoorneratigut Nuugaatsiaq Illorsuillu tassaarsuaqarneranik eqqugaapput, inuillu sisamat taamani ajunaarlutik, nunaqarfiillu taakku marluk qaqqamit sisoortoqaqqeratarsinnaanera pissutigalugu taamanili inuerutitinneqarput.
Ikerasammi:
Pingasunngorneq 12 maj nalunaaqutaq aqqanermut, 11:00
Saattuni:
Pingasunngorneq 12 maj nalunaaqutaq sisamat qeqqanut, 15:30
Uummannami:
Innuttaasunut Illorsuarmiunut sisamanngorneq 13 maj nalunaaqutaq ataatsimut. 13:00
Innuttaasunut Nuugaatsiarmiunut 13 maj nalunaaqutaq sisamanut, 16:00
Innuttaasunut Uummannarmiunut sisamanngorneq 13 maj unnukkut arfineq pingasut qeqqanut 19:30
Ukkusissat: Tallimanngorneq 14 maj ullaakkut qulingiluanut 09:00
- Nunatsinni upalungaarsimasut piareersimapput kisianni ajornerpaamik pisoqassagaluarpat 2017-imi pisoqarsimanerata assigisaanik nunatta avataanut ikiortissanik aallertariaqarpugut, Naalakkersuisut siulittaasuat, Múte B. Egede oqarpoq.
- Taamaammallu aamma naalagaaffimmut saaffiginninnerit ingerlanneqareernikuupput aammalu aqagu uanga qallunaat ministerianik oqaloqateqarninni ilaatigut aamma uani pissutsit paasisallu kingulliit aallaavigalugit qanoq ikioqatigiinnitta annertusarneqarsinnaanera kiisalu aamma taassuma avataatigut nunanik sanilitsinnik aamma qanoq pitsaasumik suleqateqarsinnaaneq upalungaarsimaneq eqqarsaatigalugu naalakkersuinikkut ingerlanneqassooq annertusarlugulu, Múte B. Egede oqarpoq.
Sisoortoq annerullunilu sakkortunerusumik tassaarsuaqassasoq
Maanna aarlerinartumik naliliineq nutaaq piareerpoq, tassanilu qaqqamit suli annerusumik sisoortoqaqqissinnaanera aallaqqaammullu ilimagisamit annerusumik tassaarsuaqarsinnaanera takutinneqarpoq: Qaqqamit sisoorsinnaasoq annertuneruvoq tassaarsuaqarsinnaaneralu taamaalilluni sakkortunerussalluni.
Norskit nunap pissusianik ilisimatusarfianni qaqqamit sisoortoqartarneranut immikkut ilisimatuut aamma naliliipput – naliliinerlu taanna pissutigalugu Múte B. Egede aamma nunalerinermut, imminut pilersornermut, nukissiuteqarnermut avatangiisinullu naalakkersuisoq Kalistat Lund kiisalu Avannaata Kommuniani borgmesterinngortussaq Sakio Fleischer peqatigalugit nunatta avannaanut angalavoq.
Politimesteri, Bjørn Tegner Bay aamma tarnip pissusianik ilisimasallit marluk aamma angalaqataapput.
AAMMA ATUARUK Tassaarsuaqarsinnaaneranik naliliineq nutaaq: Illut, nukissiorfiit peqqissaavik eqqugaaratarsinnaasut
Taakku illoqarfinni nunaqarfinnilu ulorianartorsiortinneqarsinnaasunut paasissutissiinermik ataatsimiititsiartorput. Innuttaasullu 176-it missaanniittut kissaatigigunikku nuunnissaminnut ikiorneqarsinnaapput.
Niaqornani aamma Qaarsnni ippassaq paasissutissiinermik ataatsimiititsisoqarpoq.
Ikerasanni Saattunilu paasissutissiinermik ullumi ataatsimiititsisoqassaaq.
Pinasuartumik inissiineq inissarseqqinnerlu
- Angorusutarput tassaavoq imaannaanngissinnaasunik paasissutissanik peqaraluartoq innuttaasut najugarisaminni kiffaanngissuseqarlutik najugaqarsinnaanerannik aamma oqariartorfiginissaat aamma taassuma saniatigut ajornerpaamik pisoqassagaluarpat qanoq pisoqarsinnaaneranik massakkut ilisimasat tunngavigisaat paasitissallugit, Múte B. Egede oqarpoq.
AAMMA ATUARUK Katrine Kruse Hansen Niaqornaneersoq: Maani najugaqaannassaanga
Qaqqaq ulorianartorsiortitsisoq imaanut ataatsikkut sisuussagaluaruni tamanna Qaarsut, Niaqornat, Uummannap, Saattut, Ukkusissat aamma Ikerasaap ilaanut tassaarsuaqartitsisinnaavoq.
Taamaammat inuit maanna pinasuartumik inissinneqarnissamik kingornatigullu sukkanerpaaq atorlugu inissiamik attartugassaqalernissamik periarfissamik neqeroorfigineqarput.
Inissianik nutaanik sanaartortoqassanngilaq.
Innuttaasut sumut nuukkusunnerlutik kissaateqarsinnaapput, tamatumanili inissiamik attartugassaqarnersoq apeqqutaassaaq.
