Naalakkersuisut Siulittaasuata Múte Bourup Egede (IA) Naalakkersuisoqatini peqatigalugit siunnersuutitik nutaat 31-it Inatsisartunut ukiaanerani ataatsimiinnermi akueritinniartussaavaat.Assi: KNR

Múte B. Egede: Meeqqanut inatsit nukissiorfissallu oqaluuserisassani pingaaruteqarluinnarput

Inatsisartut ukiaanerani ataatsimiinneranni Naalakkersuisut siunnersuutinik nutaanik 31-nik saqqummiussipput.

Naalakkersuisut siulittaasuat, Múte Bourup Egede (IA) Inatsisartut ukiuanik nutaamut aallarteqqammersumullu immersuinissamut piareersimavoq.

Inatsisartut ataatsimiinnerat tallimanngormat aallartippoq tallimanngornermilu 24. november naammassissalluni.

Naalakkersuisut siunnersuutinik nutaanik 31-nik ukiaanerani oqaluuserisassanik saqqummiussipput - Naalakkersuisullu siuliuttaasuat oqaluuserisassanik marlunnik pingaaruteqarluinnartutut nalilikkaminik immikkut taasaqarpoq, taassumalu meeqqanut inatsisip nutarterneqarnissaa (immikkoortoq 128) aammalu erngup nukinga atorlugu nukissiorfissuit pillugit pilersaarut (immikkoortoq 123), taakku angusariaqakkatut immikkut saqqumilaartippai.

Múte Bourup Egede isumaqarpoq Naalakkersuisunit oqaluuserisassanngortitatik tamarmik pingaaruteqartut, taakku tamarmik inuiaqatigiit nukittunerulernissaannik siunissamullu isumannaallisarluarnissaannut aqqutissatut nalileramigit, taamaattorli Naalakkersuisut siunnersuutaannit immikkoortut marluk saqqumilaartippai:

- Meeqqanut, inuusuttunut ilaqutariinnullu atukkanut pitsanngorsaataasussat, aammalu ilaatigut meeqqat pillugit inatsisip nutarterneqartariaqalersimasup ilaata nutarterneqarnissaanut alloriarnissat pingaaruteqarput, Múte Bourup Egede erseqqissaavoq.

Meeqqanut inatsisip nutarterneqarneratigut meeqqat pisinnaatitaaffii ersarissarneqassapput, anaanaaqataanermut pisinnaatitaaffiit pitsaanerulersinneqassapput ataataassutsillu nalunaarsugaanissaa ajornannginnerulersinneqassalluni, naalakkersuisut tunngavilersuipput.

Erngup nukinga atorlugu nukissiorfiit piviusunngortinneqassapput

Taamaattorli aamma inuussutissarsiutitigut nutaanik periarfissaqarnerulernissaq Naalakkersuisunut inituvoq:

- Aammali aningaasarsiorfigisassatta nutaat assigiinngitsut, avataaniit pilersorneqarnitsinnik isumalluuteqarnitsinnik annikillisaasussat, tassalu erngup nukissiorfiliornissanik aalajangernerit siorna aningaasalersorneqarnissaannut siammasinnerusumik toqqammavissaqalernissaq aaqqiiviginissaalu, taakku marluk neriuutitta ilagivaat, Bourup Egede erseqqissaavoq.

AAMMA ATUARUK Inatsisartut ukiaanerani ataatsimiinnerminni angorusutaat

Erngup nukinga atorlugu Nuummi nukissiorfimmik annertusaaneq Qasigiannguanilu nutaamik sanaartorneq 3 milliarder koruunit missaanik naleqassaaq, tamannalu pillugu Naalakkersuisut Danskit Naalakkersuisuinik peqateqarlutik siunnerfeqaqatigiinnermik isumaqatigiissuteqarput, ilaatigut naalagaaffiup aningaasaleeqataasinnaanera matumani pineqarluni.

Sinerissami sanaartorneq suliffissanik inissanillu pilersitsissaaq

Tamatuma saniatigut sinerissami sanaartornissat annertuut aqqutigalugit aalisarnermik isumalluuteqarneq annikillisarniarneqassasoq innuttaasullu suliffissaqarnikkut inissaqarnikkullu annertunerusumik pilersorneqalissasut pilersaarutaavoq:

- Massakkut sanaartorneq annertuumik sinerissami pilersaaruteqarfigivarput, taamaalilluta aamma inuussutissarsiorneq aalisarnerup saniatigut aamma aningaasarsiorneq tassuuna ingerlalluarniassammat aammalu inissaqarniarnikkut siuariartornissarput qulakkeerniarlugu, Naalakkersuisut siulittaasuat Múte Bourup Egede oqarpoq.

Akisussaassusilimmik isumatuumillu aningaasanut inatsit ilusilersorneqassaaq

Taamaattorli suna tamarmi ajornaatsutut isikkoqartutut issinnaagaluartoq, Naalakkersuisut siulittaasuata erseqqissaatigaa pilersaarutit iluatsilluassappata, taava aningaasanut inatsit akisussaassusilimmik isumatusaartumillu ilusilersorneqarsinnaappat piviusunngortitsinissamut periarfissat ajunnginnerussasut :

AAMMA ATUARUK Ammaanermi oqalugiaat: Ikippallaartut ilinniartarput aamma nakorsanik peqqissaasunillu amigaateqarpugut

- Taakku saniatigut soorunami aningaasanik aqutsineq aammalu aningaasanut inatsisissamik akisussaassusilimmik isumatusaartumillu ingerlatsinissarput pisariaqarluinnarpoq, taamaattorli aamma unittoortoqannginnissaanik qulakkeerinninniarluta ingerlatsissaagut. Ingerlarsorpugummi, pitsaasumik nunatsinni aningaasarsiornikkut inissisimanerput massakkut illersuutissaraarput, nunarsuarmi najummatsisimanartumik inissisimanitsinni, aningaasarsiornikkut kiisalu sorsuttoqarnerata kingunerisaanik killiffik eqqarsaatigalugit, Naalakkersuisut Siulittaasuat Múte Bourup Egede KNR-imut oqarpoq.
 



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl