- Qinikkatut sulinermi ileqqorissaarnissaq pingaarutilerujussuuvoq, Inuit Ataqatigiit naalakkersuisullu siulittaasuat, Múte B. Egede, oqarpoq.Assi: Mads Claus Rasmussen/Ritzau Scanpix

Múte B. Egede: Borgmesterip ingiaalluni kapitinneraa ajuusaarnarpoq

Kommuneqarfik Sermersuup borgmesteriata akiuussuserneqarnialerami inuppassuit utaqqisut ingiarsimammagit Inuit Ataqatigiit siulittaasuat ajuusaarpoq.

- Qinikkatut sulinermi ileqqorissaarnissaq pingaarutilerujussuuvoq,

Inuit Ataqatigiit naalakkersuisullu siulittaasuat, Múte B. Egede, oqarpoq.

Borgmesterip akiuussutisserneqarneqarnera pillugu suliaq:

 

  • Nuummi innuttaasunut tamanut akiuussusersuinissamut sisamanngornermi juulip ulluisa 22-anni marluniit tallimat tungaanut atuarfimmi USK-imi neqeroortoqarpoq.
  • Nalunaaqutarli tallimanngunngitsoq akiuussutissat nungummata utaqqisut akiuussusersuisunit angerlartinneqaannartariaqarput.
  • Inuttaasut arlallit akiuussusersortikkusullutik akiuussusersuineq aallartinngitsorli silami utaqqillutik siuleriiaatilereerput.
  • Siuleriiaattut ullup ingerlanerani amerliartuinnarput. Siuleriiaaqangaarmallu siuleriiaat Hotel Hans Egedep nalaanut killipput. Akunnerpassuarnillu utaqqereerlutik akiuussuserneqarsinnaanatik paasitinneqarput.
  • Borgmesteri, Charlotte Ludvigsen taassumalu atorfilittai pingasut siuleriaattut ullaap tungaani saneqquppaat, taakkulu matukkut allakkut isertinneqarput. Atorfilittat silataani siuleriaattunik nakkutiginninnermi ikiuuttussaapput.
  • Akiuussutissalersuinermut ataqatigiissaarisup, Anna Wangenheimip oqarnera naapertorlugu taakku akiuussutisserneqarnissamik piumsaqarput – taamaattoqanngippallu siuleriiaattuni ikiuiniarnatik.
  •  Kommunip siorasaaruteqartoqarneraanera itigartitsissutigaa – borgmesterillu tamanna ”paatsooqatigiinnerusimassasoq” ilimagalugu.
  • Borgmesterip siuleriiaattunik qaangiiginnarluni utaqqisorpassuit allat sioqqullugit akiuussutisserneqarsimanini utoqqatsissutigaa.
  • Namminersorlutik oqartussat utoqqatsertoq: “ Kukkusimanerput nassuerutigaarput, sialussuup ataani akunnerpassuarni utaqqisimasut akiuussuserneqaratillu angerlartiinnartariaqarsimagatsigit. Akiuussusersorneqanngitsoornerallu soorunami naammaginanngilluinnarpoq. Akiuussusersuinissamullu aaqqissuussinerlunneq pillugu utoqqatserpugut.

Nuummi innutttaasorpassuit akiuussusersorneqarnissaanut, soorlu naartusut, milutsitsisut allallu akiuussuserniarlutik akunnialuppassuani utaqqisut akiuussusernissaat juulip ulluisa 22-ani piareersarneqaleruttortoq, Kommuneqarfik Sermersuumi borgmesterip Charlotte Ludvigsenip (IA) utaqqisut qaangiinnarlugit akiuussusertittoq, KNR-ip sisamanngornermi oqaluttuaraa.

AAMMA ATUARUK Tusagassiorfik: Siuleriiaattunik qaangiineq pissaanermik atornerluineruvoq

Taamaaliorsimanerlu borgmesterip partiiata siulittaasuata ajuusaarnartippaa:

- Suliaq una ajuusaarnartutut isigivara, aamma politikeritut sulinermi inunnit allaninngaanniit salliulluni iliuuseqarfigineqarnissaq taanna mianersuussassarujussuuvoq. Inuttut naligiippugut aammalu uani kapuuinerit innuttaasunut tamanut naligiimmik ingerlanneqarlutik pineqarnikuupput, taannalu tunngaviusussaammat taamatut pisoqarnera ajuusaarnartutut isigivara.

Borgmesterip innuttaasut qaangiinnarlugit siulliulluni akiuussusertinnera innuttaasut KNR-ip oqaloqatigisaasa assigiinngitsumik isummerfigaat. Ilaasa pissusissamisoortutut isigaat ajoriffissaqartinnagulu. Ilaasali pissaanermik atornerluinertut nalilerpaat. Taamalu isummerneq Inuit Ataqatigiit siulittaasuata paasilluarsinnaavai:

- Paasilluarsinnaavara qisuariaatit assigiinngitsut taamatut apuunneqarmata. Politikikkut suliaqarnermi aammalu arlaatigut qaffasissumik atorfeqarnermi mianersuussassat annertuut pigivagut aammalu pisussaaffiit annertuut pigivagut taakkualu aallaavigalugit sulinissaq pingaarutilerujussuartut isigivara.

Siulittaasoq borgmesterimut oqaloqatiginnittoq

Inuit Ataqatigiit siulittaasuata pisimasoq tusaramiuk borgmester Charlotte Ludvigsen saaffigisimavaa.

Borgmesteri Charlotte Ludvigsen KNR-imit apersorneqarluni utoqqatserpoq, taamaaliortussaasimanngikkaluarninilu nassuerutigalugu. Taamaaliorneralu akisussaaffimmik tigusinerusoq partiip siulittaasua isumaqarpoq.

- Charlottep kukkunini, aammalu taamaalilluni kukkusoqarnera aallaavigalugu utoqqatsissuteqarlunilu akisussaaffimmik nammineq tigusinera maluginiarpara, Inuit Ataqatigiit naalakkersuisullu siulittaasuat, Múte B. Egede KNR-imut taama oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat