Mærsk immami itisuumi qilleriniarpoq

Suliffeqarfissuup Maerskip uuliasiorfiutaa, Maersk Drilling, umiarsuarnik uuliamik qillerivinnik, immami itisuumi qillerisinnaasunik, sanatitsinissaminut isumaqatigiissuteqarpoq.
Allattoq Carla Davidsen
juulip 05-at 2011 06:30

Umiarsuit qilleriviit taakku Korea Kujallermi sananeqartussat, 2014-ip qiteqqunnerani naammassissangatinneqarput, 6,7 milliardit koruunillu missaanni akeqassangatinneqarlutik.

- Immami itisuumi qillerinermi suliffeqarfinnut annernut ilanngunnissarput angorusupparput, Maersk Drillingimeersoq, Claus V. Hemmingsen, tusagassiuutinut nalunaarummini oqarpoq.

- Uulia nunarsuarmit piumaneqaraluttuinnarpoq. Taamaammat qillerineq annertusisariaqarpoq, Claus V. Hemmingsen nangippoq.

Umiarsuit qillerutit 228 meterinik angissuseqassapput, 3,6 kilometerinik itissusilimmi qillerisinnaassallutik.Umiarsuit ataanni 12 kilometeri sinnerlugu itissutilimmi suli aamma qillerisinnaassapput.

Maersk Nunatsinni qillerinissamut akuersissummik ukioq-manna siusinnerusukkut pissarsigaluarpoq, Maersk Drillingilli tusagassiuutinut nalunaarutaani ersinngilaq umiarsuit nutaat marluk Nunatsinni qillerissanersut.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq