LæseRaketten kalaallisut saqqummissaaq
Tamannalu Ilinniartitsinermik Ilisimatusarnermut institutimi nuannaarutigineqarpoq. Atuartitsissutissanik kalaallisut naqitanik amigaateqarneq annertoorujussuusoq Anna Terndrup Dammip Pamersaanermut tunngasunik suleqataasup oqaatigaa. Læserakettenilu pitsaasuuvoq, atuartitsissutinut arlalinnut atuaqatigiiaannullu assigiinngitsunut sammitinneqarami.
Anna Terndrup Dammip ilanngullugu oqaatigaa, Læserakketten atuartitsinermut naleqqulluarlunilu atoruminartuusoq atuakkami soqutiginartunik suliassanillu ilinniutaalluarsinnaasunik kiisalu pitsaasumik ilinniartitsisunut najoqqutassaqarami.
Bolivia ukiormanna immikkut sammineqarpoq, taamaattumik Amerikami Kujallermi nunami tassani inuuneq meeraallunilu inuuneq qanoq ittuunersoq oqaluttuarineqarput suliassiissutigineqarlutillu.
LæseRaketten Danmarkimi nunanut ineriartortunut suliniaqatigiiffimmit IBIS-imit saqqummersinneqartarpoq, nunanilu tamalaani ilinniartitaaneq pillugu paasisitsiniaanerulluni, suliniaqatigiiffimmilu nunat 120-t meeqqat atuartuunissamut pisinnaatitaaffiinik ilitsoqqussaralugulu oqaatsiminnik atuartinneqarnissaat sammisaraat.
Atuagaq LæseRaketten Inerisaavimmit 10.000-inngorlugu inniminnerneqarsimavoq. Taakkunanngalu atuakkat 8.000-it sinerissami atuarfinnut sapaatip akunnerata tulliani nassiussuunneqassapput.
