Lynge Lidegaardilu Tunumut angalaqatigiittut
Zackenberg Namminersorlutik Oqartussanit pigineqarpoq ulluinnarnilu Århus Universitetimit ingerlanneqarluni. Ilisimatuut tassani ilaatigut Pinngortitaleriffimmeersut silap pissusiisa allanngoriartorneri nunanilu issittuni pinngortitami ataqatigiinnernut sunniutaat ilisimatusarfigaat.
- Martin Lidegaardip suleqatigilluakkama naapinnera nuannaarutigaara, aammalu ilisimasat annertuut, Kalaallit Nunaata Zackenbergimi sulinermini nunani tamalaani silap pissusianik ilisimatusarnermi tapersiissutigisai tulluusimaarutigaakka. Ukiuni makkunani Kalaallit Nunaat eqqumaffigineqartorujussuuvoq, silap pissusiata allannguutai qaninnerpaalluta misigisinnaagatsigit. Ilisimasat maani pinngortut silap allannguutaasa nunatsinnut qanoq sunniuteqarnerinut asseqanngitsumik paasissutissiipput, tamatumalu peqatigisaanik nunarsuarmi silap pissusianut sunniutit pitsaanerusumik paasineqarnissaanut tapertaallutik. Tikeraarsimaninni sulinerup qanoq ingerlasarnera takussallugu periarfissarsivunga; maani silap pissusiani qanorpiaq pisoqarnersoq uuttortarneqartarpoq, tamannalu ilisimatusarnermut tapertaavoq pingaarutilik, Miiti Lynge oqarpoq.
Silap pissusiinik ajornartorsiut Naalakkersuisut pingaartittupilussuuaat. Ilaatigut Ilulissani erngup nukinganik nukissiorfissap qanittukkut ammarneqarnissaa eqqaaneqarsinnaavoq. Nukissiuutinimmi ataavartunik pingaartitsinermik tamanna ersersitsivoq.
- Erngup nukinganut amerlasuunik aningaasaliissuteqartarnitta kingunerisaanik ukioq manna pisortat nukissiuutinik pilersuinerisa 70%-iata nukissiuutinit ataavartunit pissarsiarineqarsinnaalernissaa angussavarput. Kalaallit Nunaata nunarsuarmi silap pissusianut akisussaaqataanini pimooruppaa, Miiti Lynge oqarpoq.
