Lykketoftip oqalugiaatimini Løkke "peqquserluttuarakasiuneraraa"

Danskit ministeriunerata Lars Løkke Rasmussenip Naalagaaffiit Peqatigiinni siulittaasoq Mogens Lykketoft ippassaq marlunngornermi sianerfigisimavaa, Lykketoft oqalugiarluni ministeriuneq "peqquserluttuarakassammik" taasimammagu.
Allattoq Karsten Sommer
januaarip 27-at 2016 05:07

Mogens Lykketoft 70-iliinerminut atatillugu Christiansborgimi privatimik ilassinninnermini oqalugiaataa matumani pineqarpoq, oqalugiaataalu taanna aviisimut Berlingske Tidendemut ingerlateqqinneqarsimalluni.

- Taamatut oqarsimanersoq oqarsimannginnersorluunniit uppernarsartikkumallugu Lykketoft sianerfigaara, tamatuminngali paasitinneqanngilanga, ministeriuneq Facebookimi quppernermini taama allappoq.

Lykketoft oqalugiaammini Venstrep naalakkersuisuutitai Lars Løkke Rasmussenimit siuttuuffigineqartut tassaanerarpai 'inuutilluni naalakkersuisuusut aatsaat taama sianiilikaartigisut iluareqqusaartigisullu'.

Aamma naalakkersuisut siulii socialdemokraatinit radikalenillu siuttuuffigineqartut pisuutippai ima "pikkorlussimatiginerarlugit siuttulutsigalutillu, allaat peqquserluttuarakasiup maanna ministeriuninngoqqinnissaa aqqutissiuussinnaasimallugu".

- Taamatut oqarsimanini uannut nassuerutigiumanngilaa, illuatungaatigullu aamma ilumuunnginnera uppernarsarumanagu. Taamaammat aamma imminiiginnarpara. Aamma privatimik pisut ataqqineqarnissaat isumaqataaffigigakku, ministeriuneq Lykketoftip oqalugiaataa pillugu taama allappoq.

Nutaarsiassaqartitsiviup Ritzauip Mogens Lykketoft oqaaseqartinniarsimagaluarpaa iluatsinnaguli.

Mogens Lykketoftip oqalugiaataa BT-p nittartagaani atuarneqarsinnaavoq.