Lykketoft: Neriuutigaara qaqugorsuarmut attaveqatigiittuassasugut

Folketingip Kalaallit Nunaanut tunngasunut ataatsimiititaliaani ilaasortat qulit Kujataani paasisassarsiorlutik angalaneranni aluminiumik aatsitsiviliornissamut pilersaarut ilanngullugu paasititsiniutigineqartussaavoq.
aggustip 27-at 2008 13:35

Socialdemokratit ataatsimiititaliami ilaasortaatitaasa ilaat, Mogens Lykketoft, angalanerminnut iluarisimaarinnippoq.

- Kalaallit Nunaanni pissutsit sapinngisamik malinnaaffiginiartarpakka, soorlu namminersorneq pillugu oqallinneq, aammattaarlu inuussutissarsiornerup siuariartornera pillugu oqallinneq, taamaammat ulluni arfineq marlunni tulliuttuni paasisassarsiornissatsinni politikerinik oqaloqateqartarnissarput, suliffeqarfinnullu paasisassarsiornissaq, pingaartippara, Mogens Lykketoft oqarpoq.

-Aluminiummimik aatsitsiviliornissaq pillugu angalanitsinni ulloq kingulleq paasissutissinneqartussaavugut. Tamanna tamatsinnut soqutiginnaatilerujussuuvoq, sanaartornissamut pilersaarutit annertoqimmata, piviusunngortinneqassappatalu Kalaallit Nunaannut sunniuteqassaqimmat, Mogens Lykketoft oqarpoq.

Paasisassarsiorluni angalanermi paasisani Folketingimi sulinermini sumut atussanerai aperineqarami akivoq, Naalagaaffeqatigiineq atatillugu sunaluunniit soqutiginaateqartuartussaasoq, naak Kalaallit Nunaannut tunngasunut suliat Folketingimi ikiliartupilooraluartut.

Arlaleriarlunilu nunatsiniillattaasarsimaqigami nunarput nuannarisorujussuanngorsimallugu oqarpoq.

Kalaallit Nunaata namminersulernissaanut atatillugu ataatsimiitsitaliaq naggammik angalanersoq ilimagineraa pillugu aperineqarami ima akivoq.

- Tamanna akisinnaangilara, aalajangigassarinngilara, neriuutigaaralu taamaatoqassanngitsoq. Neriuutigaara qaqugorsuarmut attaveqatigiittuassasugut, Folketingip Kalaallit Nunaannut tunngasunut ataatsimiititaliani Socialdemokratit ilaasortaatitaasa ilaat, Mogens Lykketoft, oqarpoq.

Ataatsimiititaliami ilaasortat marlunngornerup tungaanut angalasaqattaassapput.