Lykketoft katittorsiornerani ilassinnissutit akileraartartut akiligaannit akilerneqarput
Mogens Lykketoftip pisimasup tamanut saqqummiunneqarnera nuannarinngilaa.
- Uggornarpoq inuinnartut iliornerput taamarsuaq ajortorsuartut isigineqalersimammat. Katitinneqarnissarput kisiat qinnutigaarput. Nuannaarnerulerpugullu paasigatsigu nunaqarfiup inui 50-it missigisaat ilassinneqatigisussanngoratsigik.
- Katinnissatsinnut aaqqissuussinermut, kingornalu ilassinninnermut pilersaarutinut akuunngilluinnarpugut. Juunataap aaqqissuussineq akilerpaa, kiallu akisussaassuseqarfigineraa Kalaallit Nunaanni eqqartorneqariaqartoq, danskit aningaasaqarnermut nunanullu allanut ministererisimasaat Mogens Lykketoft Danmarkip Radioats aallakaatitassiaani Orienteringimi apersorneqarluni nassuiaavoq.
Nunatsinni qinikkat aningaasanik atornerluisarnerat pillugu atuakkiami ukiaru saqqummersussami AG Danmarkip Radioani aallakaatitassiami issuarneqarpoq allaaserineqalersut.
Atuakkiortoq Namminersornerullutik Oqartussani inatsisilerituutut 2006-imiit 2008-mut atorfeqarsimavoq. Misissuisarnermi maluginiarsimavaa qinikkat qulliusut pisortat aningaasaataannik atuisarnerat, soqutigilerlugulu itisilerlugu misissuiffigisimallugu.
- Namminersornerullutik Oqartussani ilassinnissutinut angalanernullu aningaasartuutit paasissutissartaat iternga tikingajallugu paasiniarpakka, paasisaqaqaangalu. Taamaattoq ilimaginngilara iternga tikillugu paasisaqarnissara, tamanna qularaara.
Naalakkersuinikkut sulianut nammineerlunga akulerutinngilanga, siunnersortaasimanangaluunniit.
Paasiniaanermali ingerlanerani avataanit nunap siuttuisa aningaasanik atornerluisarsimanerannik isussuunneqartutullusooq pineqartarpunga; soorlu Tivolimi ilaqutariinnut sassaalliinernut, immikkut timmisartunik inuinnartut attartornernik, elevatorimilu jakkeerserluni nutaamik taarsiinermut allaat paasisaraakka, Namminersornerullutik Oqartussani atorfilittaasimasoq, inatsisileritooq Lars Bjørknæs naggasiivoq.
