Lyberth nannut pillugit Ruslandimut ataatsimeersuarialersoq

Nannut illersorneqarnissaannut aqunneqarnissaannullu isumaqatigiissut Oslo-Konventionip atsiorneranit ukiut 40-nngorput. Tassunga atatillugu nunat nanoqarfiusut Moskvami ataatsimeersuassapput. Aalisarnermut, Piniarnermut Nunalerinermullu naalakkersuisoq Karl Lyberth Nunarput sinnerlugu ataatsimeersuarnermi peqataassaaq.
decembarip 03-at 2013 07:48

Nannut taakkulu inuuffigisaata iluaqutigineqartarneranni illugiilluni aqutsineq pillugu isumaqatigiissut Danmarkimit/Nunatsinnit, Canada/Nunavut-mit, Norgemit, Ruslandimit aamma USA-mit 1976-imi maaji qaammat atsiorneqartoq Moskvami, Ruslandimi ataatsimiinnissami oqaluuserisassat ilagivaat, isumaqatigiissut atsiorneqartoq nunat atsiortut tamarmik 1978-imi aalajangersarpaat, 1981-imilu uppernarsaqqillugu. Nannut pillugit isumaqatigiissutip piviusunngortinneqarnissaanut akisussaaffik Kalaallit Nunaata 1985-mi akisussaaffigilerpaa.

Isumaqatigiissutip ulluinnarni aqutsinermi atuutsilersinniarlugu ukiuni kingullerni 10-ni suliarineqarsimasut nalilersorneqarnerisa saniatigut, ukiuni 10-ni tulliuttuni nannunik iluaquteqarnermi illersuinermilu suleriarnissamut pilersaarut aallaavigalugu, isumaqatigiissutip atuutilersinniarnerani suut pingaarnersiorlugit suliniutigineqarnissaat nalunaarutigineqassapput.