Lyberth mianersornerulerpoq
Qeqertarsuup Tunuani aalisartut akerliussutsimik takutitsinialersaarnerisa kingorna, Qeqertarsuup Tunuani misiliilluni qaleralinniarfiusinnaasut, Aalisarnermut Naalakkersuisumit, Karl Lyberthimit, neqeroorutigineqarput.
Allattoq Carla Davidsen
septembarip 13-at 2013 10:22
Qalerallit 700 tonsit ukiup sinnerani misiliilluni qaleralinniarfiusinnaasuni aalisarneqarsinnaalerput , taakku aalisarneqassallutik piffinni aalajangersimasuni pingasuni, aamma angallatit 6 meterisut takitiginngitsut kisimik tamaani aalisarsinnaassallutik.
Qalerallit 700 tonsit aggulullugit qaammatikkaartumik pisassiissutigineqassapput.
Septembarimi, oktobarimi aamma novembarimi pisassiissutigineqassapput qaammammut 200 tonsit, decembarimili pisassiissutigineqassallutik 100 tonsit.
Taama immikkut pisassiinermi, Pinngortitaleriffimmut isumaqatigiissutaavoq, qalerallit pisarineqartut tamarluinnarmik angissusaat sumilu pisarineqarsimanersut aalisartunit nalunaarutigineqartassasut.
