Lund Olsen: Urani mianersorfigisariaqarpoq
Nunatsinni uran-imik aatsitassarsiorsinnaaneq itigartittuaannarnagu ammaannissaa nalilersoqqittariaqartoq, Naalakkersuisoq Jørgen Wæver Johansen ulloqeqqanut radioavisimi, oqarpoq.
Kalaallit Nunaat sinnerlugu Nunat avannarliit siunnersuisoqatigiivini ilaasortaq Johan Lund Olsen isumaqarpoq, nunarput mianersortariaqartoq.
Nunatsinni uranisioqqinnissaq aammalu piaanissaq isumaliutigineqassappat mianersuutigeqqissaartariaqarparput. Siullermik tamanna skuerineqassappat taava tassa inatsisartut ukiorpassuarni politikerisaanut akerliusumik iliuuseqalissaagut. Taamaammat taanna allanngortinniaraanni minnerpaamik inatsisartut saqqummiivigineqaqqaartariaqarput, taakkulu akersitinniaqqaarlugit. Taassuma saniatugt nunatta nunani avannarlerni ukiorpassuarni suliaqarnitsinnut naapertuutinngilaq, tassa akerliuvoq.
Johan Lund Olsenip Jørgen Wæver Johansen aamma akerlilerumavaa, oqarmat nunani avannarlerni uranimik nukissiuutinik atuisoqarmat nunarput uranimik piiaanissamut naaggaartuaannarsinnaajunnaartoq.
Erseqqissaatigaa Sverige-mi uranimik nukissiorfiit atorunnaalernerat, Barsebächimiittoq matoreerpoq, sinnerisalu matunissaat sulissutigineqarluni. Sverigemi uranisiorneq ukiormanna aamma matuneqarpoq. Nunani avannarlerni kisiartaalluni Finland-ip uranimik nukissiorfiit ingerlanniarallarpai.
Nunatta nunatut pinngortitamik mianerinnittutut nunarsuup sinneranut nittarsaannera uranisiulernikkut sequminneqarsinnaasoq, Johan Lund Olsen isumaqarpoq.
- Sumiluunniit uranimik piiaasoqassatillugu aamma piiaasoqartillugu pinngortitaq aammalu avatangiisit ukiorparparujussuarni sunniuteqartussamik mingutsinneqarsinnaapput, urani navianartorujussuugami. Taamaattuminguna inatsisartut uranisiornissaq ukiorpassuarni naaggaartuarsimagaat, tamannalu allanngortinniaraanni inatsisartunut saqqummiusseqqaarluni allamik isummernissaat ujartorneqaqqaartariaqarpoq.
Johan Lund Olsen IA sinnerlugu inatsisartuni ilaasortaq taama oqarpoq. Kalaallit Nunaata nunani avannarlerni ilisimaneqaatigaa pinngortitamik mingutsitsinernut suugaluanulluunniit akerliusarnini.
Taamaattumik nunarput uranisiortitsilissagaluarpat killup tungaanut aallarnerussasoq, Johan Lund Olsen naliliivoq.
