Lukasjenko Hvideruslandimi præsidentinngoqqissaaq
Hvideruslandimi præsidentissamik sapaatiummat qinerissoqarmat, Hvideruslandip maannamut præsidenterisaa Aleksander Lukasjenko ajugaarujussuartutut suaarutigineqarpoq.
Lukasjenko qinersisartut 82,6 procentiinit taaguuneqarsimavoq, unammillertaalu marluk, Aleksander Milinkivitsj qinersisartut 6 procentinnaannit aappaalu Sergej Gajdukevitsj 3,5 procentiinnarnit taaguunneqarsimammata, qinersinermi peqquserluttoqarsimanissaa pasilliutigineqalerpoq.
Tamanna pillugu Hvideruslandip illoqarfiisa pingaarnersaanni Minskimi inuppassuit 10.000-likkaat ippassaq akerliussutsimik takutitsipput.
Europamiut qinersinermut nakkutilliiartortitaasa OSCE-meersut Hvideruslandimi qinersineq pillugu nakkutilliinerminni naliliinertik ullumi saqqummiutissagaat nutaarsiassaqartitsivik Ritzau allaaserisaqarpoq.
Hvideruslandimi præsidentimut qinersinerup inernera tunngavigalugu Hvideruslandimik aningaasarsiornikkut pillaasoqassanersoq EU-mi maanna oqaluuserineqalerpoq.
EU-mi nunanut allanut ministerit ataatsimeeqatigiittut Hvideruslandimi qinersinermi peqquserluttoqarsimanissaa pasitsaappaat, taamaattorli Hvideruslandip nunanut allanut ministereqarfia nalunaarpoq qinersinermi inernerusoq tutsuiginartuullunilu uppernarsaatissaqarmat ataqqisariaqartoq.