Louise ukiuni 60-ini Meeqqat Angerlarsimaffiani sulisimasoq: Tupinnaqaaaq
Pingasunngornerup ullaavani 77-inik ukiulik Loiuse Zeeb pisarnermisut iggavimmineerujoorpoq.
- Qissigilerpara iggavimmi aaqqissuillunga inuk. Taava pileriaqaakka suleqatikka silatinni tussiartut, Louise Zeeb oqarpoq. Tassuma ukiuni 60-ini Uummannami Meeqqat Angerlarsimaffiani sulinera pingasunngormat nalliuttorsiutigineqarpoq.
- Taamaalillunga killitsinnermut alarsimasarlugillu qiviartarlugillu. Isaaleriaqaat ullaakkorsiutissanik nassarlutik. Taavalu ullaakkorsiorput namminneq. Tupinnaqaaq. Utoqqatsinaq.
Tussiarnerit ataatarpunaarnerillu
Louise 18-inik ukioqarluni 1960-imi meeqqat angerlarsimaffianni sulilerpoq. Sulileqqaarnerminiillu eqqaamasaqarpoq.
- Kiffanngornera eqqaamaruttorakku. Fritimertarpugut to tiimit. Kiffat inaanni ineqarpugut. Unnukkut innalerpata tussiartarpugut, innartillugit ataatarpunaartillugillu.
Louisellu ukiuni 60-ni meeqqat angerlarsimaffiani sulinerani meeqqat najugaqartut 500-t 700-llu akornanniittut najugaqarnikuusut, meeqqat angerlarsimaffianni pisortap Ann Andreassenip oqaatigaa.
- Tulluusimaarutigisorujussuuarput. Imminullu tulluusimaarutiginissaminut peqqutissaqarluarpoq. Toqqissisimanerujussuarmimmi meeqqanut meeqqat angerlarsimaffianniilersunut pilersitsisarpoq, Ann Andreassen oqarpoq.
Ajaappiarluni sulisartoq
Louisellu meeqqat angerlarsimaffianni sulinermini suliassat assigiinngitsorpassuit misilittagaqarfigai.
- Suna tamaat, aamma arnat angutillu suliaat suliarisinnaagakkit. Qimusseqataallungalu, taamatut. Tamaasa nuannaraakka soorunalimi. Igallungalu iffiorlungalu. Massakkut kisiat utoqqaligama affaannanngornikuugama ajaappiarlunga sulisarpunga.
Louse Zeebip nalliuttorsiutigineqarnissaa ilaatigut meeqqanit ulapputigineqarpoq. Meeqqat ernisarfigaat Louiselu aamma tupaallatsinneqarpoq.
- Tassa Rasmus Lyberth qaaqqunikuuuarput. Taanna aamma Louisep ukiuni 40-nngortorsiorneranut peqataanikuuvoq. Taamaammat Louise ilaqutaalu meeqqat angerlarsimaffianniittullu ullorsiorluarnissarput neriuutigaarput. Ann Andreassen oqarpoq.